საქართველოს მოსახლეობის 55,2 პროცენტი მიიჩნევს, რომ საქართველოში არ არის პოლიტიკური პარტია, რომელიც მისთვის მნიშვნელოვან პრობლემებს მოაგვარებს. ამის შესახებ CRRC-ის კვლევაშია ნათქვამი.

ფოტო: CRRC

საქართველოს მოსახლეობის მხოლოდ 10 პროცენტია პოლიტიკური პარტიების საქმიანობით სრულად კმაყოფილი, ხოლო 46,3 პროცენტი უფრო კმაყოფილია, ვიდრე უკმაყოფილო.

ამასთან, საქართველოს მოსახლეობის 66 პროცენტს არასდროს წაუკითხავს პოლიტიკური პარტიის საარჩევნო პროგრამა. კითხვაზე — ხმის მიცემისას, უფრო მნიშვნელოვანია პარტიის საარჩევნო პროგრამა თუ ლიდერების ვინაობა — მოსახლოების 38,5 პროცენტი პირველს ასახელებს, ხოლო 45,8 პროცენტი მეორეს.

ფოტო: CRRC

კითხვაზე — რა კრიტერიუმით ირჩევენ პარტიები, ვინ წამოაყენონ კანდიდატად საპარლამენტო არჩევნებზე — მოსახლეობა ასე პასუხობს:

  • არ ვიცი/უარი პასუხზე: 20,8%;
  • პროფესიონალიზმით: 24,1%;
  • საზოგადოებაში ცნობადობით: 17,1%
  • პატიოსნებით: 6,6%
  • პირადი კავშირების პარტიის ლიდერებთან: 18,7%
  • ფულით: 12,4%
  • სხვა: 0,3%.

მოსახლეობის 60,7 პროცენტი მიიჩნევს, რომ არჩევნებში კაცს გამარჯვების უფრო მაღალი შანსი აქვს, ვიდრე ქალს. მოსახლეობის 17 პროცენტი მოუწონებდა ქალიშვილს, პოლიტიკაში წასულიყო, 17 პროცენტი კი — ვაჟიშვილს.

ფოტო: CRRC

საქართველოს მოსახლეობის 52 პროცენტი სრულად ეთანხმება, ხოლო 35 პროცენტი ეთანხმება მოსაზრებას, რომ პოლიტიკაში ადამიანები საკუთარი კეთილდღეობისთვის მიდიან.

კვლევის ფარგლებში 1786 რესპონდენტი (599 თბილისში, 1187 რეგიონებში) გამოკითხა; რესპონდენტები შემთხვევითი შერჩევის შერჩევის პრინციპით, კიშის ცრილის გამოყენებით შეირჩნენ. გამოკითხვის საშუალო ცდომილების ზღვარი 2,9%-ია, თუმცა თითეულ კითხვას ინდივიდუალური ცდომილების ზღვარი აქვს და, შესაძლოა, ის არ ემთხვეოდეს საშუალო ცდომილების ზღვარს. საველე სამუშაოები 2018 წლის 16-27 ნოემბრის პერიოდში მიმდინარეობდა.

საქართველოს მთელ ტერიტორიაზე მოსახლეობის გამოკითხვა ჩატარდა კავკასიის კვლევითი რესურსების ცენტრის (CRRC) მიერ, ღია საზოგადოების ფონდისა და საერთაშორისო ორგანიზაცია International IDEA ერთობლივი პროექტის ფარგლებში.