შს მინისტრმა გიორგი გახარიამ ტელეკომპანია იმედის ეთერში, ნარკოტიკული ნივთიერების ზემოქმედების ქვეშ მყოფი მძღოლების სისხლის სამართლის წესით დასჯის შესახებ ახალ კანონზე ისაუბრა. ჟურნალისტის კითხვაზე, რატომ არის მკაცრი კანონი ნარკოტიკის შემთხვევაში და არა ალკოჰოლის შემთხვევაში, გიორგი გახარიამ უპასუხა, რომ ეს სხვადასხვა რანგის დანაშაულია და შეუძლებელია მათი გათანაბრება:

"ამ ნაწილში, ერთადერთი რის გასწორებაც შეიძლება, არის ის, რომ სიმთვრალის ნაწილიც გავამკაცროთ, იმიტომ რომ აქ ერთმნიშვნელოვნად უნდა გვესმოდეს, ნარკოტიკული საშუალების რეალიზება და გასაღება ამ ქვეყანაში ლეგალური არ არის. რეგლამენტის მიხედვით, როდესაც მძღოლს პატრულ-ინსპექტორი გააჩერებს, პირველი, რასაც შეამოწმებს, ეს არის ალკოჰოლური თრობა. მხოლოდ შემდეგ გადავა ნარკოტიკულ თრობაზე და ამაშიც არის თავისი ლოგიკა".

2019 წლის პირველი აპრილიდან სატრანსპორტო საშუალების მძღოლებს ნარკოტიკული ნივთიერების, მათ შორის კანაფის ზემოქმედებაზე შეამოწმებენ. ძალაში შედის სისხლის სამართლის კოდექსის 276-ე მუხლი. კანონში შესული ცვლილებით, ნარკოტიკული ნივთიერების ზემოქმედების ქვეშ მანქანის მართვისთვის გათვალისწინებულია ჯარიმა, ან ერთ წლამდე თავისუფლების აღკვეთა. ასევე, სამი წლის ვადით სხვადასხვა უფლებების, მათ შორის, სატრანსპორტო საშუალების მართვის უფლების ჩამორთმევა.