უკრაინაში მიმდინარე საპრეზიდენტო არჩევნების ეროვნული ეგზიტპოლის 18 საათის შედეგებით, კომიკოსმა ტელეწამყვანმა ვლადიმერ ზელენსკიმ ხმების 30,4 პროცენტი მიიღო, 17,8 პროცენტი აიღო მოქმედმა პრეზიდენტმა, პეტრო პოროშენკომ, ხოლო, 14,2 პროცენტი — იულია ტიმოშენკომ.

ეროვნული ეგზიტპოლი ილკო კუჩერივის დემოკრატიური ინიციატივების ფონდმა, კიევის სოციოლოგიის საერთაშორისო ინსტიტუტმა და რაზუმკოვის ცენტრმა ჩაატარა.

კანდიდატები მსგავსი თანმიმდევრობით გადანაწილდნენ TNS-ის მიერ ჩატარებული ეგზიტპოლის შედეგებით, რომლითაც საპრეზიდენტო არჩევნების მეორე ტურში, ასევე ზელენსკი და პოროშენკო გავიდნენ:

  • ვლადიმერ ზელენსკი — 30,1%;
  • პეტრო პოროშენკო — 18,5%;
  • იულია ტიმოშენკო — 14%.

"ძალიან ბედნიერი ვარ, მაგრამ ეს არ არის საბოლოო შედეგი", — უთხრა ზელენსკიმ BBC-ის, მას შემდეგ რაც ეგზიტპოლი გამოაცხადეს.

პეტრო პოროშენკომ კი შედეგებსა და მეორე ადგილზე გასვლას "მკაცრი გაკვეთილი" უწოდა.

TNS-ის ეგზიტპოლი საპრეზიდენტო არჩევნების მიმდინარეობისას კვლევითმა კომპანიებმა, Kantar TNS-მა და Info Sapiens-მა ჩაატარეს, არხის 1+1 დაკვეთით. მკვლევარებმა დაახლოებით 20 ათასი სრულწლოვანი (18+) რესპონდენტი პერსონალური ინტერვიუს სახით გამოკითხეს, 600 საარჩევნო უბანზე უკრაინის მასშტაბით (გარდა სპეციალური საარჩევნო უბნებისა სამხედრო და სამედიცინო დაწესებულებებში, ასევე საზღვარგარეთ და რუსეთის მიერ ოკუპირებულ ტერიტორიებზე). ცდომილება 0,7 პროცენტია.

გაიგეთ მეტი: რა უნდა ვიცოდეთ უკრაინის საპრეზიდენტო არჩევნებზე