საქართველოში სომხეთის პრემიერმინისტრის, ნიკოლ ფაშინიანის ვიზიტის ფარგლებში სომხეთ-საქართველოს მთავრობათაშორისი ეკონომიკური თანამშრომლობის კომისიის მე-15 სხდომა გაიმართა, რომლის შემდეგაც ნიკოლ ფაშინიანმა და ირაკლი კობახიძემ ერთობლივი ბრიფინგი გამართეს.

სიტყვით გამოსვლისას ირაკლი კობახიძემ განაცხადა, რომ საკმაოდ რთული ვითარებაა მსოფლიოში და ამ ფონზე ძალიან მნიშვნელოვანია ორ ქვეყანას, საქართველოს და სომხეთს შორის თანამშრომლობის კიდევ უფრო მეტად გაღრმავდეს.

"მსურს კიდევ ერთხელ მივესალმო ჩემს სომეხ კოლეგას, ბატონ ნიკოლ ფაშინიანს და სომხეთის დელეგაციას საქართველოში. როგორც მოგეხსენებათ, დღეს გაიმართა საქართველო-სომხეთის ეკონომიკური თანამშრომლობის მთავრობათაშორისი კომისიის მე-15 სხდომა, სადაც წარმოდგენილი იყვნენ შესაბამისი მთავრობების წარმომადგენლები, მინისტრები. შედგა საინტერესო დისკუსია სხვადასხვა თემაზე, რომელიც უკავშირდება ორი ქვეყნის თანამშრომლობას. ჩვენ ვხედავთ, რომ საკმაოდ რთული ვითარებაა შექმნილი ჩვენს გარშემო და მით უმეტეს, ამ ფონზე ძალიან მნიშვნელოვანია ჩვენს ქვეყნებს შორის თანამშრომლობის კიდევ უფრო მეტად გაღრმავება", — განაცხადა ირაკლი კობახიძემ.

საუბრისას მან ასევე ისაუბრა საქართველო-სომხეთს შორის არსებულ სავაჭრო-ეკონომიკურ პარტნიორობაზე და თქვა, რომ სავაჭრო დონის თვალსაზრისით, სომხეთი საქართველოს პარტნიორების ათეულშია, ტურიზმის კუთხით კი — სამეულში.

"ხაზი უნდა გავუსვათ იმას, რომ ჩვენ გვაქვს ძალიან კარგი სავაჭრო-ეკონომიკური პარტნიორობა. სავაჭრო დონის თვალსაზრისით, სომხეთი არის საქართველოს პარტნიორების ათეულში, რაც შეეხება ტურიზმსა და ვიზიტორებს, ამ კუთხით, სომხეთი სამეულში იკავებს ადგილს ჩვენი ქვეყნისთვის. ჩვენთვის ძალიან ღირებულია თანამშრომლობის ეს ასპექტი, სავაჭრო-ეკონომიკური თანამშრომლობა, ტურიზმის მიმართულებით გაცვლა. მოხარულნი ვართ, რომ ტურიზმის მიმართულებით არის სულ უფრო მზარდი ინტერესი საქართველოს მოქალაქეებში, ესტუმრონ სომხეთს და მაქსიმალურად ხელი უნდა შევუწყოთ, ამ კუთხით, ჩვენს ქვეყნებს შორის თანამშრომლობის განვითარებას", — თქვა ირაკლი კობახიძემ.

ოცნების პრემიერმა ხაზი გაუსვა იმას, რომ რეგიონში მშვიდობას და სტაბილურობის კუთხით, საქართველო ძალისხმევას არ დაიშურებს.

"მოხარულნი ვართ, რომ ძალიან დადებითი დინამიკაა რეგიონში თანამშრომლობის განვითარების კუთხით. მოხარულნი ვართ და ამას ხაზი გავუსვით დღეს მთავრობათაშორის კომისიაზე, რომ ხელი მოეწერა ისტორიულ სამშვიდობო შეთანხმებას სომხეთსა და აზერბაიჯანს შორის. ეს დადებითი ტენდენციები ქმნის ძალიან კარგ საფუძველს იმისათვის, რომ ჩვენ, ყველამ ერთად ვიზრუნოთ ჩვენი რეგიონის სტაბილურობის უზრუნველყოფაზე, უზრუნველვყოთ მშვიდობა ჩვენს რეგიონში. ამ კონტექსტში, კიდევ ერთხელ გვინდა, გავუსვათ ხაზი ჩვენს მზაობას, ხელი შევუწყოთ რეგიონში მშვიდობას და სტაბილურობას. ამ კუთხით, საქართველო ძალისხმევას არ დაიშურებს.

მინდა, კიდევ ერთხელ ხაზი გავუსვა გამორჩეულ პარტნიორობას ჩვენს ქვეყნებს შორის. ეს პარტნიორობა, მეგობრობა, თანამშრომლობა არის ნამდვილად სამაგალითო და ჩვენი ქვეყნების და ჩვენი ხალხების წინაშე ჩვენი პასუხისმგებლობაა, რომ მაქსიმუმი გავაკეთოთ ამ თანამშრომლობისა და მეგობრობის კიდევ უფრო მეტად გაღრმავებისთვის.

დასასრულს, ბატონ პრემიერმინისტრს, ნიკოლ ფაშინიანს მინდა, გადავუხადო მადლობა მისი გამორჩეული პირადი წვლილისთვის, რომელიც მას შეაქვს ჩვენს ორ ქვეყანას შორის თანამშრომლობისა და მეგობრობის გაღრმავებაში,", — თქვა ირაკლი კობახიძემ.

ნიკოლ ფაშინიანის თქმით, "დღეს სომხეთი და აზერბაიჯანი აყალიბებენ ეკონომიკურ ურთიერთობებს და კავშირებს საქართველოს დახმარებით, საქართველოს ხელშეწყობით, ეს ნამდვილად შესაქები ამბავია".

"დიდი მადლობა ძვირფასო პრემიერმინისტრო, სომხეთის და საქართველოს მთავრობების წარმომადგენლებო, მე მაქვს პატივი, ვიყო კიდევ ერთ შეხვედრაზე, ამ ფორმატის ჰქვია სომხეთ-საქართველოს მთავრობათაშორისი ეკონომიკური თანამშრომლობის კომისიის მე-15 სხდომა, რადგან მეთხუთმეტეა, ეს იმას ნიშნავს, რომ ჩვენი აღქმით, ეს ურთიერთობა ვითარდება. მნიშვნელოვანი ასპექტი ჩვენი დღის წესრიგისა ის არის, რომ კიდევ უფრო უკეთესი ეკონომიკური შედეგები გვქონდეს. მნიშვნელოვანია აღინიშნოს, რომ დღეს საუბარი გვქონდა ეკონომიკურ ორმხრივ რეგიონულ და საერთაშორისო დღის წესრიგზე, სხვადასხვა საკითხზე გვქონდა დისკუსია, ასევე ვნახეთ, სად გვაქვს ყველაზე დიდი პოტენციალი თანამშრომლობის განვითარებისთვის. კიდევ ერთხელ მინდა, გადავუხადო მადლობა საქართველოს პრემიერმინისტრს, ბატონი ირაკლის, მთელი ამ დროის განმავლობაში, რომ უჭერს მხარს მშვიდობის პროცესს, პირადად უჭერს მხარს სომხეთს და აზერბაიჯანს შორის მშვიდობის პროცესს. მინდა, გადაგიხადოთ მადლობა, იმ მხარდაჭერისთვის, რომელსაც ჩვენ ვგრძნობთ და ვხედავთ. დღეს სომხეთი და აზერბაიჯანი აყალიბებენ ეკონომიკურ ურთიერთობებს და კავშირებს საქართველოს დახმარებით, საქართველოს ხელშეწყობით, ეს ნამდვილად შესაქები ამბავია და ნამდვილად მადლობას გიხდით ამ ფასეული წვლილისთვის", — განაცხადა სომხეთის პრემიერმინისტრმა, ნიკოლ ფაშინიანმა ირაკლი კობახიძესთან ერთად გამართულ ბრიფინგზე.

ნიკოლ ფაშინიანი თბილისში 3 მარტს ჩამოფრინდა. მას აეროპორტში ოცნების საგარეო საქმეთა მინისტრი მაკა ბოჭორიშვილი დახვდა, შემდეგ კი ოცნების პრემიერმა, ირაკლი კობახიძემ მას არაფორმალურ ვახშამზე უმასპინძლა.