GDS-ის გადაცემაში შეხვედრები რეგიონალურ მედიასთან ჟურნალისტის კითხვაზე, შესთავაზა თუ არა ბიძინა ივანიშვილმა ნიკა გვარამიას 5 მილიონი, ყოფილმა პრემიერმა უპასუხა, რომ მას უფრო სერიოზული ადამიანებისგანაც მოუსმენია არასერიოზული განცხადებები:

"გვარამიაზე სერიოზულ რეაქციას ვერ გავაკეთებ, მაგის სისულელეებზე, რომ რაღაცას იტყვის და უნდა ვუპასუხო, ეს უბრალოდ სასაცილოა. გვარამია ისეთია საინტერესო, როგორიც არის. ეგეთი რუსთავი 2 და ასეთი გვარამია მე თუ მკითხავთ არის წამალი საზოგადოებისთვის განვითარებისთვის".

ივანიშვილის თქმით, რუსთავი 2-ის დღევანდელი სახე იმის მაჩვენებელია, რომ წინა ხელისუფლებასთან შედარებით დღევანდელი მთავრობის პირობებში მეტი დემოკრატია და მეტი მედიის თავისუფლებაა.

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.