თავდაცვის სამინისტროს ყოფილი სამხედრო მფრინავი ეკა ქვლივიძე უწყებას გენდერული ნიშნით დისკრიმინაციაში ადანაშაულებს. ქვლივიძე ამბობს, რომ ამ მიზეზით მან სამინისტროსთან კონტრაქტი გაწყვიტა, რის გამოც სასამართლოში უჩივლეს.

ქვლივიძის თქმით, ის 11 წელი მსახურობდა საქართველოს შეიარაღებულ ძალებში. მისივე თქმით, 2017 წელს ამერიკის შეერთებულ შტატებში მოსამზადებელ კურსს გადიოდა და დაბრუნების შემდეგ წოდებრივად დააქვეითეს. მფრინავი ამბობს, რომ არ იყო გათვალისწინებული საფრენოსნო პროგრამაში რის გამოც სამოქალაქო განხრით სწავლა მოითხოვა და ნებართვა მისცეს, თუმცა მოგვიანებით აუკრძალეს.

მისი თქმით, მინისტრის ბრძანებით გორში სამხედრო აკადემიაში გაგზავნეს, სადაც დამწყებ მფრინავებს ასწავლიდა. ამბობს, რომ მოითხოვა ლექციების პარალელურად ფრენის უფლება ჰქონოდა, თუმცაუარი უთხრეს. გარდა ამისა მოითხოვა ჩართულიყო ავღანეთის მისიაში, თუმცა როგორც ამბობს, ამაზეც უარი მიიღო.

"უშუალოდ მეთაურს როდესაც გავესაუბრე და ვკითხე, ვიყავი თუ არა საფრენ პროგრამაში გათვალისწინებული, ასეთი წინადადება მითხა, მცირე რესურსებია საფრენ აპარატზე და ამ რესურსების ქალ მფრინავში გახარჯვას არ ვაპირებთ და ზემოდან ზოგადად ქალი მფრინავიც არ სჭირდებათ და იცოდეო, მთელი წლის განმავლობაში შენ მფრინავის იმედი არ გქონდესო", — აცხადებს ქვლივიძე.

მისი თქმით, ამ დროს ხელძღვანელის ფუნქციას სიმონ წიკლაური ასრულებდა. მისივე თქმით, პატაკის დაწერისა და სამსახურის დატოვების შემდეგ თავდაცვის მინისტრს წერილობით აცნობა მომხდარის შესახებ, თუმცა უწყებას რეაგირება არ ჰქონია.

"იმისათვის, რომ საქართველოს შეიარაღებულ ძალებში მემსახურა და სამხედრო მფრინავი ვყოფილიყავი ძალიან ბევრი სტერეოტიპი დავარღვიე, ბევრი ვიბრძოლე. ძალიან ბევრი სასწავლო კურსი გავიარე, როგორც სამოქალაქო, ისე სამხედრო. ყველა წარმატებით და არცერთი საყვედური არ მიმიღია. იმიტომ, რომ ეს იყო ჩემი მოწოდება", — აცხადებს ქვლივიძე.

ქვლივიძის ინტერესებს სასამართლოში ადამიანის უფლებათა ცენტრი დაიცავს. მათი განცხადებით, უწყება კონტრაქტის გაწყვეტის გამო 28 000 ლარიან ჯარიმას მოითხოვს, რაც აბსურდულად მიაჩნიათ.

თავდაცვის სამინისტროში განაცხადეს, რომ ქვლივიძეს მსახურების პერიოდში გენდერული დისკრიმინაციის შესახებ წერილობით არ უცნობებია და მას შემდეგ განაცხადა, რაც უწყებამ კონტრაქტის დარღვევისთვის სასამართლოში უჩივლა. უწყების განცხადებით, "უსაფუძვლოდ" კონტრაქტის პირობების დარღვევას ვერ დაუშვებენ.