შინაგან საქმეთა მინისტრი გიორგი გახარია აცხადებს, რომ შვილმოკლული მამების, ზაზა სარალიძისა და მალხაზ მაჩალიკაშვილის საქმეებს შორის ტოლობის დასმა არასწორია. მისი თქმით, მაჩალიკაშვილის საქმე ტერორიზმს ეხება და ეს არავის უნდა დაავიწყდეს.

"არცერთხელ მაჩალიკაშვილის საქმეზე კომენტარი არ გამიკეთებია, არც გავაკეთებ, არასოდეს", — განაცხადა გახარიამ. მინისტრმა არ უპასუხა კითხვას იმის შესახებაც, თუ რა მიზეზით არ საუბრობს ამ თემაზე.

მსგავსი განცხადებები თემირლან მაჩალიკაშვილის მკვლელობის საქმეზე იუსტიციის მინისტრმა, თეა წულუკიანმა და პრეზიდენტმა, სალომე ზურაბიშვილმაც გაავრცელეს. 19 მარტს, სალომე ზურაბიშვილმა აღინიშნა, რომ მალხაზ მაჩალიკაშვილსა და ზაზა სარალიძის საქმეებს ერთ დონეზე არ აყენებს, ხოლო ჟურნალისტის კითხვაზე, რის მიხედვით ახდენს ამ ადამიანების დიფერენცირებას, უპასუხა "ვიცი რის მიხედვითაც".

21 მარტს კი, იუსტიციის მინისტრმა განაცხადა, რომ სახელმწიფომ თემირლან მაჩალიკაშვილთან მიმართებით დანაშაული არ ჩაუდენია და ეს ფაქტი არ არის დამტკიცებული.

ადამიანის უფლებების სწავლებისა და მონიტორინგის ცენტრმა (EMC) წულუკიანისა და ზურაბიშვილის განცხადებები მაჩალიკაშვილის საქმეზე პოლიტიკური უპასუხისმგებლობისა და ადამიანის უფლებების უგულებელყოფის უხეშ მაგალითებად შეაფასა.