ნიუ-იორკი, ბედფორდის ქუჩა ნომერი 90 - შესაძლოა ეს დასახელება არაფერს გეუბნებათ, თუმცა ქუჩა უკვე 25 წელზე მეტია იზიდავს ტურისტებს მთელი მსოფლიოდან.

მიზეზი მარტივია, სწორედ ამ ქუჩაზე მდებარე ერთ-ერთი შენობის ფასადია გამოყენებული ლეგენდარული სერიალის, მეგობრების ყველა სერიაში. დიახ, სერიალების სამყაროს ექვსი შეუცვლელი პერსონაჟი აქ ცხოვრობდა.

კორტნი კოქსი, რომლის ინსტაგრამიც დიდი ხანია ჩვენი დაკვირვების ერთ-ერთი მთავარი სამიზნეა, სერიალის ფანებს მუდმივად ანებივრებს კოლეგებთან გადაღებული ძველი თუ ახალი ფოტოებით. თუმცა, რამდენიმე დღის წინ გადაღებულმა ვიდეომ ყველა მოლოდინს გადააჭარბა.

მსახიობი ნიუ-იორკში ბედფორდის ქუჩა 90-ს ეწვია და ძველი გრძნობები კიდევ ერთხელ გაგვიღვიძა.

"ღამე მშვიდობისა მეგობრები, სახლში მივდივარ", - ამ ფრაზის მოსმენას თითოეული ჩვენგანი წლებია ელის და აი, ეს დღეც დადგა. მონიკა სახლში დაბრუნდა.

პოსტის აღწერაში კი დაწერა - "ეს დღეები მენატრება". კორტნი, ნეტავ იცოდეს ჩვენ როგორ გვენატრება მეგობრების ახალი ეპიზოდები და თითოეული პერსონაჟი.

როგორც უკვე ვთქვით, კორტნი ფანებს ხშირად უღვიძებს სერიალთან დაკავშირებულ მოგონებებს. ასეთი შემთხვევა კი რამდენიმე კვირის წინაც მოხდა. მსახიობმა მეგობრების ერთ-ერთი საკულტო სცენა რეალურ ცხოვრებაში გადმოიტანა.

დიდი მადლობა კორტნი იმისთვის, რომ ყოველთვის გახსოვართ!