ნაციონალური მოძრაობის წევრის, სალომე სამადაშვილის თქმით, პრეზიდენტი სალომე ზურაბიშვილი თავისი განცხადებებით იმპიჩმენტის დაწყების საფუძველს იძლევა. მისივე თქმით, პრეზიდენტის რანგში ზურაბიშვილის განცხადებები სახელმწიფოსთვის საფრთხის შემცველია.

"დროა ჩვენ დავიწყოთ მსჯელობა სამართლებრივ პასუხისმგებლობაზე პრეზიდენტის განცხადებასთან დაკავშირებით. მე ვფიქრობ, და არ მაქვს იმედი, რა თქმა უნდა, რომ დღევანდელ პოლიტიკურ ვითარებაში იქნება შესაძლებელი სალომე ზურაბიშვილის განცხადების საფუძველზე იმპიჩმენტის პროცედურის დაწყება. მაგრამ მომავალში, როცა პოლიტიკური სიტუაცია იქნება შესაძლებელი, ვფიქრობ, ის საკუთარი განცხადებებით საფუძველს აძლევს სწორედ იმპიჩმენტის პროცედურების დაწყებას", — განაცხადა სალომე სამადაშვილმა.

პრეზიდენტმა სალომე ზურაბიშვილმა გადაცემა რეაქციაში განაცხადა, რომ აგვისტოს ომის დროს ექსპრეზიდენტმა, მიხეილ სააკაშვილმა "დაბომბა ცხინვალი, რომელიც ნაწილობრივ დაცლილი იყო".

"ეს არ არის საქართველოს დადანაშაულება, რადგან ომის პასუხისმგებლობა არის იმ ქვეყნის, რომელიც სამართლებრივად ომზე პასუხისმგებელია და დაიწყო საომარი მოქმედებები. ჩვენ არ გადავსულვართ საზღვარზე. მე ვამბობ, რომ დანაშაული არის ჩვენი ქვეყნის მიმართ. ეს არის შიდა პოლიტიკა. ამაში ვერ ვთანხმდებით", — აღნიშნა პრეზიდენტმა.