მეჩეთებზე თავდასხმის შემდეგ ახალი ზელანდიის ხელისუფლება იარაღზე კონტროლის გამკაცრებას აპირებს. ქვეყნის პრემიერ-მინისტრმა, ჯასინდა არდერნმა პრესკონფერეციაზე განაცხადა, რომ ნახევრად ავტომატური იარაღის გაყიდვის აკრძალვაზე ფიქრობს.

"ერთი რამ შემიძლია ზუსტად გითხრათ, რომ ჩვენი კანონმდებლობა იარაღის კონტროლზე შეიცვლება. აქამდე მსგავსი მცდელობები იყო და ახლა ამის დრო მოვიდა", — აღნიშნა არდერნმა

ახალ ზელანდიაში ნახევრად ავტომატური იარაღის ყიდვა 16 წლის ზევით პირისთვის ინტერნეტითაც შეუძლია. ამასთანავე ხელისუფლება განიხილავს, რომ იარაღის მოდიფიკაცია და სამხედრო იარაღთან მიახლოება აიკრძალოს. პრემიერ-მინისტრმა თქვა, რომ მეჩეთებზე თავდასხმაში ერთ-ერთ მთავარ მონაწილეს ნახევრად ავტომატური და მოდიფიცირებული იარაღი ჰქონდა, რომელიც მან ლეგალურად იყიდა.

15 მარტს შეიარაღებული პირები ახალი ზელანდიის ქალაქ კრაისტჩერჩში ორ მეჩეთს დაესხნენ თავს. თავდასხმის შედეგად 49 ადამიანი დაიღუპა, ხოლო 50-მდე დაშავდა. პოლიციამ ოთხი ეჭვმიტანილი პირი დააკავა, მათგან ერთი კი მოგვიანებით გაუშვა. აღმოჩნდა, რომ დაკავებული სამოქალაქო პირია, რომელიც იარაღს ატარებდა და თავდასხმის დროს პოლიციის დახმარება სურდა.

ერთ-ერთი თავდამსხმელი, წარმოშობით ავსტრალიელი, 28 წლის ბრენტონ ტარანტი მეჩეთში შესვლამდე პირდაპირ ეთერში გავიდა და თავისი განზრახვის შესახებ მოყვა და თავდასხმამდე მანიფესტი გამოაქვეყნა. მისი საუბარი ისლომოფობიური შინაარსის იყო და მაგალითებად სხვა თავდამსხმელები, ანდრეს ბრეივიკი და დარენ ოსბორნი მოჰყავდა. ტარანტს პოლიციამ ბრალი თავდასხმის დღესვე წაუყენა. ის 16 მარტს სასმართლოს წინაშე წარსდგა და პატიმრობა შეეფარდა.

ამავე თემაზე: