საგარეო საქმეთა მინისტრი მიხეილ ჯანელიძე სამუშაო ვიზიტით სტრასბურგში გაემგზავრა. მინისტრმა მედიასთან საუბრისას განაცხადა, რომ 2016 წლის 13-14 სექტემბერს, ვიზიტის ფარგლებში განიხილავენ ასოცირების დღის წესრიგსა და სავიზო ლიბერალიზაციის საკითხებს:

"დავიწყეთ მუშაობა ასოცირების ახალ დღის წესრიგზე, რომელმაც უნდა განსაზღვროს ჩვენი ინტეგრაციის პროცესისა და თანამშრომლობის მომავალი სამი წელი. ამიტომ ვისაუბრებთ იმ ძირითად მიმართულებებზე რომელიც გვინდა რომ აისახოს დღის წესრიგში. ასევე ვიზალიბერალიზაციაზე საბჭოსთან უნდა მოხდეს შესაბამისი განხილვები, ამიტომ ამ პროცესებზეც გვექნება საუბარი".

საგარეო საქმეთა სამინისტროს ინფორმაციით, სტრასბურგში მინისტრი შეხვდება ევროპარლამენტის ვიცე-პრეზიდენტსა და სხვადასხვა ფრაქციისა და საპარლამენტო კომიტეტის წარმომადგენლებს. მათ შორის, გაიმართება მინისტრის შეხვედრა ევროპარლამენტში საქართველოს საკითხზე მომხსენებელთან მარია გაბრიელთან.

სამუშაო ვიზიტის ფარგლებში მიხეილ ჯანელიძე შეხვდება ევროკომისარს ევროკავშირის სამეზობლო პოლიტიკისა და გაფართოების საკითხებში, იოჰანეს ჰანს.

შეხვედრების მთავარი საკითხები იქნება საქართველო - ევროკავშირის ურთიერთობების დღის წესრიგში არსებული აქტუალური საკითხები, სავიზო რეჟიმის ლიბერალიზაციის პროცესის მიმდინარეობა და ევროპარლამენტთან თანამშრომლობის მნიშვნელობა.