ეთიოპიაში ავიაკატასტროფის შემდეგ ავსტრალიამ და სინგაპურმა Boeing 737 Max 8-ის ფრენები დროებით შეაჩერა. მანამდე ფრენები შეზღუდეს ჩინეთმა, ინდონეზიამ და ეთიოპიამ. აშშ-ს სამოქალაქო ავიაციის ფედერალური სამსახური ბოინგის ფრენების აკრძალვის აუცილებლობას ვერ ხედავს.

ასევე, ცალკეულმა ავიაკომპანიებმა გადაწყვიტეს, რომ ბოინგს აღარ გამოიყენებდნენ, მათ შორისაა არგენტინული კომპანია Aerolineas, მექსიკური Aeromexic და ბრაზილიური Gol და Cayman Airways. ყაზახეთმა კი მოუწოდა კომპანიებს პერსონალს დამატებითი ტრენინგები ჩაუტარონ.

10 მარტს ავიაკომპანია Ethiopian Airlines-ის Boeing 737 Max 8, რომლის ბორტზე 157 ადამიანი იყო, ჩამოვარდა და ყველა მგზავრი დაიღუპა. ბოლო ექვსი თვის განმავლობაში ამავე მოდელის ბოინგი უკვე მეორედ ჩამოვარდა. ინდონეზიური ავიახაზების თვითმფრინავი ოქტომბერში ზღვაში ჩავარდა, რის შედეგადაც 189 ადამიანი დაიღუპა.