ყოფილმა პრემიერმინისტრმა, ბიძინა ივანიშვილმა, გადაცემაში - შეხვედრები რეგიონულ მედიასთან საუბრისას განაცხადა, რომ მმართველ პარტიას ძველი კოალიციის წევრებიდან ამ არჩევნებში კონკურენტი არ ჰყავს:

"ქართულ ოცნებას ალტერნატივა არ ჰყავს, არც რესპუბლიკელების, არც თავისუფალი დემოკრატების სახით, რაც შეეხება მრეწველებს, ისინი იოლად მიყვებოდნენ ძირითად გუნდს, თუმცა თუ გავიხსენებთ გოგი თოფაძის რამდენიმე განცხადებას, რომელიც მისი პრორუსულობის ეჭვს ბადებდა, შემდგომ ეტაპზე მათ დახვეწეს ეს მიმართულება და აშკარად პრორუსული კვალი დაედოთ დღეს მრეწველებს. შესაბამისად, მათ რესპუბლიკელებისა და თავისუფალი დემოკრატების გვერდით ვეღარ დავასახელებ. ეროვნული ფორუმს რაც შეეხება, გაუგებარია ჩემთვის, მაჟორიტარი დაასახელეს და მანაც ის თქვა, ბიძინა უნდა დამთავრდეს პოლიტიკაშიო".

ბიძინა ივანიშვილმა დასძინა, რომ ძველი კოალიციიდან ქართული ოცნების სტრატეგიას ყველაზე მეტად თავისუფალი დემოკრატები და რესპუბლიკელები იზიარებენ, თუმცა მოსახლეობას მათი მხარდაჭერისკენ ვერ მოუწოდებს. ივანიშვილი ასევე მიიჩნევს, რომ რესპუბლიკელები თავისი პარტიის ინტერესებს სახელმწიფოზე წინ აყენებენ.

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.