ამერიკელი მსახიობის, ლუკ პერის გარდაცვალების შემდეგ რივერდეილის მესამე სეზონის სერიების გადაღებები შეჩერდა.

სერიალის აღმასრულებელმა პროდიუსერებმა, გრეგ ბერლანტიმ, სარა სარა სჩეჩტეტმა, რობერტო აგუირე-საკასამ და ჯონ გოლდვოთერმა Warner Bros. ტელევიზიასთან ერთად განცხადება გაავრცელეს:

"ძალიან დაგვამწუხრა ლუკ პერის გარდაცვალების ამბავმა. ის ჩვენი ტელევიზიებისა და რივერდეილის საყვარელი წევრი იყო. ლუკი იყო საუკეთესო, მზრუნველი, პროფესიონალი დიდი გულით და ყველა ჩვენგანის ნამდვილი მეგობარი. მამის შესანიშნავი ფიგურა და მასწავლებელი შოუს ახალგაზრდა მსახიობებისთვის. ლუკი საოცრად გულუხვი იყო და ის გადასაღებ მოედანს სიყვარულითა და სიკეთით ავსებდა. ვუსამძიმრებთ მის ოჯახს ამ უმძიმეს წუთებში".

რივერდეილის მესამე სეზონის გადაღებები ლუკ პერის გარდაცვალების დღესვე შეჩერდა. როგორც The Hollywood Reporter წერს, ამის მიზეზი სერიალის მონაწილეებისთვის პერისთან გამოსათხოვებელი დროის მიცემა იყო.

პერი სერიალში არჩის მამის, ფრედ ენდრიუსის როლს ასრულებდა და ის შოუში რივერდეილის დასაწყისიდან მონაწილეობდა. ჯერჯერობით უცნობია, ამოიღებენ თუ არა სერიალიდან მის პერსონაჟს.

ლუკ პერი ორშაბათს, 4 მარტს ლოს-ანჯელესის საავადმყოფოში 52 წლის ასაკში გარდაიცვალა. მსახიობმა 27 თებერვალს ინსულტი ჰგადაიტანა.

ლუკ პერიმ პოპულარობა თინეიჯერული ამერიკული სერიალით ბევერლი ჰილზი, 90210 დილან მაკკეის როლით მოიპოვა.