პარლამენტის დარგობრივი კომიტეტის თავმჯდომარემ, რომან კაკულიამ თიბისი ბანკის დამფუძნებლებს, მამუკა ხაზარაძესა და ბადრი ჯაფარიძეს ბოდიში მოუხადა იმისთვის, რომ სხდომაზე სიტყვის თქმის საშუალება არ მისცა. ამის შესახებ მან Palitra News-ის ეთერში ისაუბრა.

"ჩემი ჩანაფიქრი კი არ იყო მათთვის სიტყვის არმიცემა... მე ასეთი გადაწყვეტილება მივიღე პიროვნულად... უბრალოდ, ისეთი კაკაფონია იყო უკვე, რომ ის არ დაემსგავსებოდა არც მათი მხრიდან და არც არავის მხრიდან საგნობრივ საუბარს იმ თემებზე, რომელიც მათ სურდათ", — განაცხადა მან.

კაკულიას თქმით, მას ერჩივნა ხაზარაძესა და ჯაფარიძეს ესაუბრათ და კითხვებზე პასუხები მიეღოთ. მანვე აღნიშნა, რომ ეროვნული ბანკის პრეზიდენტის პოზიციამ ამ გადაწყვეტილების მიღების გზა ჩაუკეტა.

კაკულიამ აღნიშნა, რომ ეს პირველი სხდომა იყო მსგავს ფორმატში და მომზადებული ვერ შეხვდა. მისი თქმით, არ ელოდა ეროვნული ბანკის პრეზიდენტის მისვლას და სხდომაც სხვანაირად დაგეგმა.

დღეს, 25 თებერვალს დარგობრივი ეკონომიკის კომიტეტის სხდომაზე თიბისი ბანკის საქმეზე უნდა ემსჯელათ, თუმცა სხდომა ისე დასრულდა, რომ საკითხზე არ უმსჯელიათ. 57 წუთის განმავლობაში დეპუტატები ფორმატზე შესათანხმებლად კამათობდნენ, თუმცა უშედეგოდ. საბოლოოდ, რომან კაკულიამ სხდომა დაასრულა.

ფორმატზე დავა ეროვნული ბანკის პრეზიდენტის, კობა გვენეტაძის განცხადებას მოყვა. გვენეტაძის განმარტებით, რეგულატორის მიერ მიღებული გადაწყვეტილების შეფასება ღია სხდომაზე, რომელსაც ბანკის წარმომადგენლებიც ესწრებიან მართებული არ არის და ეს დააზარალებს ბანკის ინტერესებს. გვენეტაძის აზრს მხარს უჭერდნენ ქართული ოცნების დეპუტატები არჩილ თალაკვაძე, მამუკა მდინარაძე და დავით მათიკაშვილი. თალაკვაძემ ისიც აღნიშნა, რომ მსგავსი ფორმატი ეწინააღდეგება ბანკისა და რეგულატორის თანამშრომლობის პრინციპებს.

სხდომის დასრულების შემდეგ ხაზარაძემ განაცხადა, რომ არ ეთანხმება გვენეტაძის მოსაზრებას. მისი თქმით, რამე ზიანი თუ შეიძლებოდა მიყენებოდა თიბისი ბანკს უკვე მიადგა. მისივე განმარტებით, შეილახა ქვეყნის რეპუტაციაც. ხაზარაძემ განაცხადა ისიც, რომ მზად არიან კიდევ ერთხელ მივიდნენ პარლამენტში და ელოდებიან საკანონმდებლო ორგანოსგან მიწვევას.

გაიგეთ მეტი: