ე.წ. ციანიდის საქმეზე მსჯავრდებული დეკანოზი გიორგი მამალაძე ღუდუშაურის კლინიკიდან #18 პენიტენციურ სამკურნალო დაწესებულებაში გადაიყვანეს. სპეციალური პენიტენციური სამსახურის განცხადებით, მამალაძე შესაბამის მკურნალობას იქ გააგრძელებს.

15 თებერვალს დეკანოზი ღუდუშაურის კლინიკაში ინსულტის წინასწარი დიაგნოზით გადაიყვანეს. სამდღიანი გამოკვლევების შემდეგ ნევროლოგების კონსილიუმმა დაასკვნა, რომ თავის ტვინის ორგანული დაზიანების ნიშნები გამოვლენილი არაა. გარდა ამისა, 20 თებერვალს კიდევ ერთი კონსილიუმის შედეგად დადგინდა, რომ დეკანოზს დისოციაციური მოტორული აშლილობის დიაგნოზი დაესვა.

კონსილიუმის დასკვნაში მითითებულია, რომ პაციენტი უჩივის მარჯვენა ზედა და ქვედა კიდურების მოძრაობის უნარისა და სენსორული შეგრძნებების დაკარგვას, რისი ორგანული საფუძველიც გამოკვლევებით არ დადგინდა. კონსილიუმის დასკვნის თანახმად, გასათვალისწინებელია ისიც, რომ გიორგი მამალაძე 2 წელია ფსიქოლოგიური სტრესისა და იზოლაციის მდგომარეობაშია.

პენიტენციური სამსახური კონსილიუმის დასკვნის საფუძველზე აღნიშნავს, რომ ნოზოლოგიის მკურნალობის ძირითადი მეთოდია ფსიქოთერაპია, ხოლო ფარმაკოთერაპია გამოიყენება თანმხლები დარღვევების (მაგალითად დეპრესიის, ან შფოთვის) სიმპტომების რედუქციისთვის.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

2018 წლის 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.

ამავე თემაზე: