საზოგადოებრივ მაუწყებლიდან გათავისუფლებული ათეულობით თანამშრომლიდან ოთხი მოსარჩელე, მორიგების გზით, აღდგენილია დაკავებულ თანამდებობაზე. ამის შესახებ ინფორმაციას ორგანიზაცია ადამიანის უფლებათა ცენტრი ავრცელებს, რომელიც მოსარჩელეებს სამართლებრივი დახმარებას უწევდა. მათი ინფორმაციით, ერთი მოსარჩელე, მხარესთან მორიგების გზით დაკმაყოფილდა ფულადი კომპენსაციით, ხოლო ორ საქმეზე ბათილად სცნეს გათავისუფლების ბრძანება და მაუწყებელს ერთი წლის შრომის ანაზღაურების კომპენსაცია დაეკისრა.

2018 წლის აგვისტოში, საზოგადოებრივი მაუწყებლის მენეჯმენტმა მისვლიდან 20 თვის შემდეგ სამაუწყებლო სეზონის "ეფექტიანად წარსამართად" რამდენიმე ათეული თანამშრომლი არჩევანის ზღვარზე დააყენა: წავიდნენ სამსახურიდან ორთვიანი კომპესაციით, ან "საჭიროების შემთხვევაში" გამოძახებას დაელოდონ.

საზოგადოებრივი მაუწყებლის პროფესიულმა კავშირმა მიმართა საქართველოს შრომის, ჯანმრთელობისა და სოციალური დაცვის მინისტრს, მედიაციის დაწყების მიზნით დავის მედიატორის დანიშვნის თაობაზე. შემათანხმებელი პროცედურებისა და მორიგების უშედეგო მცდელობის შემდეგ, 2018 წლის 18 სექტემბერს საზოგადოებივი მაუწყებლის თანამშრომლებმა მიიღეს ბრძანება განთავისუფლების თაობაზე. პროფკავშირები ამბობენ, რომ იმ თანამშრომლების რაოდენობა, რომლებსაც შეთავაზება მიუვიდათ, 150-ს აღწევს, მენეჯმენტის თქმით კი ეს რიცხვი 70-მდეა.

ამავე თემაზე: