საქართველოს სრულწლოვანი ქართულენოვანი მოსახლეობის ზუსტად ნახევარს სმენია უზენაესი სასამართლოს მოსამართლეების არჩევის პროცესის შესახებ. ამაზე CRRC-საქართველოს, ადამიანის უფლებების სწავლებისა და მონიტორინგის ცენტრისა (EMC), და ინფორმაციის თავისუფლების განვითარების ინსტიტუტის (IDFI) კვლევაში წერია.

ფოტო: CRRC, IDFI, EMC

კვლევის მიხედვით, მათგან ვისაც სმენია მოსამართლეების შერჩევაზე, დაახლოებით მეხუთედი (22%) ნდობას უცხადებს ამ პროცესს, თითქმის ნახევარი (48%) არ ენდობა, ხოლო 30%-ს ჩამოყალიბებული პოზიცია არ აქვს.

კვლევაში ასევე ნათქვამია, რომ ყველა შემთხვევაში, მიუხედავად იმისა, აქვს თუ არა მოსახლეობას ინფორმაცია უზენაესი სასამართლოს მოსამართლეობის კანდიდატების შესახებ, ისინი უფრო მეტად ამბობენ, რომ კანდიდატები უზენაეს სასამართლოში უვადოდ არ უნდა დაინიშნონ. კვლევის კიდევ ერთი მიგნებაა ისიც, რომ რაც უფრო უკეთ იცნობს მოსახლეობა კანდიდატს, მით უფრო დიდი ალბათობით ამბობს, რომ იგი უზენაეს სასამართლოში არ უნდა დაინიშნოს.

"საქართველოს მოსახლეობის იმ ნახევრიდან, რომელსაც უზენაეს სასამართლოში მოსამართლეთა კანდიდატურების წარდგენის შესახებ სმენია, მხოლოდ 13 პროცენტი ეთანხმება, რომ კანდიდატები კეთილსინდისიერებისა და კომპეტენტურობის ნიშნით შეარჩიეს. 45 პროცენტმა არ იცის, ან — არ აქვს ჩამოყალიბებული პოზიცია, ხოლო 41 პროცენტი არ ეთანხმება ამ მოსაზრებას".

კვლევა მომზადდა ევროკავშირის მხარდაჭერით. მოსამართლეთა კანდიდატების წარდგენის პროცესის შესახებ საქართველოს მოსახლეობის ცოდნისა და დამოკიდებულების დასადგენად CRRC-საქართველომ 2019 წლის 28 იანვრიდან 4 თებერვლამდე პერიოდში ჩაატარა სატელეფონო გამოკითხვა. გამოკითხვა ჩატარდა ევროკავშირის მიერ დაფინანსებული პროექტის "სასამართლო რეფორმის განხორციელების მხარდაჭერა" ფარგლებში. გამოიკითხა საქართველოს სრულწლოვანი ქართულენოვანი 804 მოქალაქე. მონაცემები საქართველოს მოსახლეობის წარმომადგენლობითია. ცდომილების ზღვარი საშუალოდ 2,6 პროცენტის ტოლია.