"სრული აბსურდია, წმინდა წყლის ბოდვას ჰგავს", — ასე უპასუხა თიბისი ბანკის სამეთვალყურეო საბჭოს წევრმა ბადრი ჯაფარიძემ On.ge-ს კითხვას, უკავშირდება თუ არა პროკურატურის მიერ დაწყებული გამოძიება ფულის გათეთრების მასშტაბურ საქმეს. გამოძიებას ესტონეთის პროკურატურა ატარებს. საქმეში საქართველოსა და აზერბაიჯანის მხარის ბრალეულობაც იკვეთება.

ბადრი ჯაფარიძის თქმით, თიბისი ბანკი არის საჯარო კომპანია, რომელიც ლონდონის საფონდო ბირჟის პრემიუმ სეგმენტშია, რაც ყველაფერს ამბობს.

"იქ რომ მოხვდეთ, თქვენ უნდა გაიაროთ ისეთი ტიპი ტრანსფარენტულობა უნდა აჩვენოთ, რომელიც გამორიცხავს ფულის გათეთრებაზე საუბარს, არამედ რაიმე კანონდარღვევას და გადაცდომას", — განაცხადა ბადრი ჯაფარიძემ.

მას შემდეგ, რაც პროკურატურამ თიბისი ბანკის მიერ სავარაუდო ფულის გათეთრების საქმეზე გამოძიება დაიწყო, On.ge დაინტერესდა უკავშირდებოდა თუ არა ეს საქმე ერთი თვის წინ დაწყებულ საერთაშორისო გამოძიებას. პროკურატურაში განგვიცხადეს, რომ გამოძიების ინტერესებიდან გამომდინარე ამ საკითხზე კომენტარს ვერ გააკეთებდნენ.

ესტონეთის გენერალური პროკურორი, ლავლი პერლინგი აცხადებს, რომ ევროპაში ფულის გათეთრების ყველაზე მასშტაბური საქმე საქართველოსა და აზერბაიჯანში ჩადენილ დანაშაულებებს პირდაპირ უკავშირდება. ინფორმაციას ამის შესახებ, ამერიკული გამოცემა Bloomberg ავრცელებს.

ესტონელი სამართალდამცავები აცხადებენ, რომ ისინი აქტიურ კოორდინაციაში არიან ქართველ და აზერბაიჯანელ კოლეგებთან. მიმდინარე გამოძიების ფარგლებში, სავარაუდოდ, გაიზრდება ეჭვმიტანილთა და დაკავებულთა რაოდენობაც.