ერთიანმა ნაციონალურმა მოძრაობამ გორში პარტიის ახალი სახეები და საარჩევნო პროგრამა წარადგინა. პარტიის მხარდამჭერებს ენმ-ს ლიდერებმა სიტყვით მიმართეს.

როგორც დავით ბაქრაძემ განაცხადა, 2016 წლის არჩევნები იმედის არჩევნებია:

"ამ არჩევნებმა საქართველოს უნდა მოუტანოს წინსვლა, ამ არჩევნების შედეგად საქართველოს უნდა ჰყავდეს ხელისუფლება, რომელსაც ესმის ხალხის პრობლემები, აქვს კონკრეტული გეგმა და ხედვა, როგორ მოაგვაროს ეს პრობლემები და რომელსაც გააჩნია ცოდნა, კომპეტენტურობა და ენერგია იმისთვის, რომ ხალხის პრობლემები გადაჭრას და ქვეყანა წინ წაიყვანოს".

ენმ-ს წევრის სანდრა რულოვსის თქმით კი, ენმ აუცილებლად გაიმარჯვებს საპარლამენტო არჩევნებში:

"კიდევ 4 წელი ამ მმართველობის პირობებში და სამწუხაროდ, ჩვენი ქვეყნიდან არაფერი დარჩება. მიწებს აითვისებენ იქიდან, თქვენ ძალიან კარგად იცით. სახეზე გვაქვს ეკონომიკური სიდუხჭირე. სწორედ ამიტომ, ჩვენ გვჭირდება სხვა კურსი, სხვა მიმართულება. არ შეიძლება ასეთი უპატრონობა, უსუსურობა და ჩვენ ნამდვილად ხელში გვაქვს ის ბერკეტი, ის იარაღი, რომელსაც ჩვენ 8 ოქტომბერს გამოვიყენებთ".