შინაგან საქმეთა მინისტრის მოადგილემ, ნათია მეზვრიშვილმა განაცხადა, რომ 2018 წელს წინა წელთან შედარებით რეგისტრირებული დანაშაული გაზრდილია. მისი განმარტებით, მატება ძირითადად იმ დანაშაულებზე მოდის რომლებზეც მომართვიანობა გაიზარდა ან აღრიცხვიანობა გაუმჯობესდა. მისივე თქმით, ამის მიზეზი საზოგადოების ცნობიერების ამაღლება და პოლიციისადმი გაზრდილი ნდობაა.

უწყების სტატისტიკური მონაცემებით, 2018 წელს 2017 წელთან შედარებით ოჯახში ძალადობა გაზრდილია 122%-ით, ხოლო ადევნება 6-ჯერ. მათი ინფორმაციით, უცვლელია მკვლელობების (108, 109) მაჩვენებელი, 2,5 %-ით შემცირებულია ყაჩაღობა, ხოლო 17,4 %-ით შემცირებულია ჯანმრთელობის მძიმე დაზიანება.

უწყებაში ამბობენ, რომ სტატისტიკური ზრდის 75% მოდის საკუთრების წინააღმდეგ და ჯანმრთელობის წინააღმდეგ მიმართულ დანაშაულებზე (ძირითადად მსუბუქ დაზიანებებზე), აგრეთვე მუქარაზე, იძულებაზე და თაღლითობაზე, ანუ იმ დანაშაულებზე, რომელთა აღრიცხვიანობა 2018 წელს მკვეთრად გაუმჯობესდა.

მეზვრიშვილის განმარტებით, უწყებაში დანაშაულის აღრიცხვიანობა გააუმჯობესეს და არეგისტირებენ ყველა იმ შემთხვევას, სადაც დანაშაულის მცირედი ნიშანი მაინც იკვეთება ან პოლიციას გააჩნია დანაშაულის ჩადენის მცირედი ეჭვი მაინც. მეზვრიშვილმა აღნიშნა, რომ მხოლოდ ციფრები ვერ გახდება ქვეყანაში რეალური კრიმინოგენული მდგომარეობის განმსაზღვრელი. მისი თქმით, მნიშვნელოვანია რეგისტრირებული დანაშაულის შინაარსის, დანაშაულის აღრიცხვის პრაქტიკის, პოლიციისადმი მომართვიანობის მაჩვენებლის და სხვა ფაქტორების გათვალისწინება.