ვენესუელის პრეზიდენტი ნიკოლას მადურო ქვეყანაში სამოქალაქო ომის დაწყებას არ გამორიცხავს. მან დემონსტრაციულად კიდევ ერთხელ უარყო ევროკავშირის ულტიმატუმი ქვეყანაში ვადამდელი საპრეზიდენტო არჩევნები დაენიშნა. ულტიმატუმის ვადა 3 თებერვლამდე იყო.

აშშ-ს პრეზიდენტმა დონალდ ტრამპმა CBS-სთან ისევ აღნიშნა, რომ კრიზისის დასაძლევად სამხედრო ჩარევა ისევ ვარიანტად რჩება. მადურომ გააფრთხილა ტრამპი, რომ ჩარევის შემთხვევაში ვიეტნამის ომის სცენარს გაიმეორებს.

"გაჩერდი, გაჩერდი, დონალდ ტრამპ! შენ უშვებ შეცდომებს, რომლებსაც შენი ხელების სისხლით გასვრა შეუძლია და შენ თეთრ სახლს სისხლმოსვრილი დატოვებ", — განაცხადა მადურომ.

უკვე რამდენიმე კვირაა ნიკოლას მადუროს გადადგომის მოთხოვნით კარაკასში მრავალათასიანი აქცია ჩატარდა. ვენესუელის ეროვნული ასამბლეის თავმჯდომარემ, ხუან გუაიდომ ქვეყნის დროებით პრეზიდენტად თავი 24 იანვარს გამოაცხადა. მისივე თქმით, ის დაასრულებს ქვეყანაში ნიკოლას მადუროს დიქტატორულ რეჟიმს, ჩამოაყალიბებს გარდამავალ მთავრობას და სამართლიან საპრეზიდენტო არჩევნებს ჩაატარებს.

გუაიდოს ლეგიტიმურობა ლათინური ამერიკის ბევრმა ქვეყანამ აღარა. მხარდამჭერებს შორის არიან აშშ, კანადა, ევროკავშირის წევრი ქვეყნები და საქართველო. აშშ-მ ვენესუელის კუთვნილ ნავთობკომპანიას სანქციებიც დაუწესა.

ნიკოლას მადუროს ქვეყანაში ჯარისა და უზენაესი სასამართლოს მხარდაჭერა აქვს. გარდა ამისა, მის ლეგიტიმურობას აღიარებენ რუსეთი, ჩინეთი, თურქეთი, ირანი, კუბა და აფხაზეთისა და სამხრეთ ოსეთის დე ფაქტო რესპუბლიკები.

ნიკოლას მადურო, ვენესუელას პრეზიდენტად პირველად 2013 წელს აირჩიეს. 2018 წელს 1 300 000%-იანი ინფლაციის მიუხედავად, მადურო უკვე მეორედ გახდა ქვეყნის პრეზიდენტი, თუმცა არჩევნების შედეგები არალეგიტიმურად ცნო დემოკრატიული სახელმწიფოების ნაწილმა. მადუროს არალეგიტიმურ პრეზიდენტად მიიჩნევს საქართველოს ხელისუფლებაც.

ევროპის რამდენიმე ქვეყანამ ნიკოლას მადუროს ვადამდელი საპრეზიდენტო არჩევნების დასანიშნად 8-დღიანი ვადა მისცა, წინააღმდეგ შემთხვევაში ლეგიტიმურ მმართველად ხუან გუაიდოს აღიარებდნენ. მადურომ ულტიმატუმის შესრულებაზე უარი თქვა.

თუმცა მადუროს ვადამდელი საპარლამენტო არჩევნების ჩატარება სურს. მომდევნო არჩევნები 2020 წელსაა დაგეგმილი და ეროვნულ ასამბლეაში უმრავლესობას ამჟამად ოპოზიცია იკავებს. ვადამდელი საპარლამენტო არჩევნების ჩატარებას კონსტიტუციური ასამბლეაც ემხრობა. კონსტიტუციური ასამბლეა მადურომ პარლამენტის საპირწონედ და შექმნა და იგივე ფუნქციები დააკისრა. მადუროს "პარლამენტში" უმრავლესობას მისი მხარდამჭერები იკავებენ.

ამავე თემაზე: