სტივენ პრუიტი ინგლისურენოვანი ვიკიპედიის მოხალისე რედაქტორია. მას შექმნილი აქვს 35 ათასი ორიგინალი სტატია და შესწორებული აქვს რეკორდული რაოდენობა — თითქმის 3 მილიონი.

Ser Amantio Di Nicolao — ასე ჰქვია პრუიტს ვიკიპედიაზე. 2015 წლიდან, მას ყველაზე მეტი სტატია აქვს რედაქტირებული და ეს რიცხვი თითქმის ყოველდღიურად იზრდება.

2017 წელს, პრუიტი ჟურნალმა Time-მა ინტერნეტის 25 ყველაზე გავლენიანი ადამიანების სიაში შეიყვანა. ის მონაწილეობს პროექტში Women In Red, რაც იმ ქალებზე სტატიების შექმნასა და ცნობიერების ამაღლებას ეხება, რომელთა მიერ შეტანილი წვლილიც სხვადასხვა დარგში წლების განმავლობაში შეუმჩნეველი იყო.

იანვრის მიწურულს, ამერიკულმა ტელეკომპანია CBS-მა მასზე რეპორტაჟი მოამზადა, სახელად "შეხვდით კაცს, რომელიც ვიკიპედიაზე განთავსებული ინფორმაციის მესამედის მიღმაა".

ვიკიპედიის ჯადოქარი რეპორტაჟის დასაწყისში ქართულ საგალობელს, მრავალჟამიერს მღერის. მისი მოსმენა 00:58 წამიდან შეგიძლიათ.