დღეს, 26 აპრილს, საია უმრავლესობასა და საპარლამენტო/არასაპარლამენტო ოპოზიციის წარმომადგენლებს შეხვდა იმისთვის, რომ მათთვის ორგანიზაციის მიერ შემუშავებული საარჩევნო სადამკვირვებლო მისია გაეცნო.

როგორც საიას საარჩევნო პროგრამის კოორდინატორმა, ირმა პავლიაშვილმა On.ge-სთან საუბარში განმარტა, პროგრამის მიზანია, 2016 წლის არჩევნები მაქსიმალურად გამჭვირვალედ და დემოკრატიულად ჩატარდეს, ამასთან არჩევნების პროცესში ნებისმიერი ხარვეზი სწრაფად გამოავლინონ:

"დღევანდელი შეხვედრის მიზანია, წარმოვადგინოთ ჩვენი სადამკვირვებლო მისია. გარდა პოლიტიკურ პარტიებთან შეხვედრებისა, ასევე შევხვდებით მედიასა და არასამთავრობო სექტორს იმისთვის, რომ მათ ჩვენი სადამკვირვებლო მისია გავაცნოთ".

პავლიაშვილის თქმით, აღნიშნული შეხვედრები მაისში დაიწყება და ორგანიზაცია ამის შესახებ მედია საშუალებებს, არასამთავრობო სექტორის წარმომადგენლებსა და მათ, ვინც დაინტერესებულია საარჩევნო პროცესებით, წინასწარ შეატყობინებს:

"მოვიწვევთ და გავუზიარებთ, თუ რას ემსახურება საია წინასაარჩევნო პერიოდში".

შეხვედრაზე იმყოფებოდა რესპუბლიკური პარტიის წარმომადგენელი, თამარ ხიდაშელი, რომელმაც განაცხადა, რომ მის პარტიას მოეწონა საიას მიერ შემუშავებული გეგმა:

"ერთადერთი შენიშვნა გვქონდა იმასთან დაკავშირებით, რომ მედიის მონიტორინგის ჩატარებაც კარგი იქნებოდა, რადგან მის როლს, წინასაარჩევნო პერიოდში, დიდი მნიშვნელობა აქვს".

საიას მიერ წარმოდგენილ პროექტს USAID აფინანსებს.