სომხეთის პრეზიდენტის, არმენ სარქისიანის ბრძანებით, ქვეყნის პრემიერ-მინისტრი ისევ ნიკოლ პაშინიანი გახდა. დღეს, 14 იანვარს სომხეთის ახლადარჩეული ეროვნული კრების პირველი სხდომა გაიმართა.

მისი გეგმა გამართლდა. 9 დეკემბერს ვადამდელ საპარლამენტო არჩევნებში ნიკოლ პაშინიანის ბლოკმა ჩემი ნაბიჯი გაიმარჯვა. ყოფილმა მმართველმა რესპუბლიკურმა პარტიამ კი პარლამენტში ადგილები ვერ მოიპოვა.

ახალ პარლამენტში 132 დეპუტატია და სამ ფრაქციად იყოფა: ბლოკი ჩემი ნაბიჯი (88 მანდატი), პარტია აყვავილებული სომხეთი (26) და პარტია ლუსავორ აიასტან (18 მანდატი).

2018 წლის აპრილში ე.წ. ხავერდოვანი რევოლუციის შედეგად სომხეთის ყოფილი პრეზიდენტი და პრემიერ-მინისტრი სერჟ სარგსიანი გადადგა. მთავრობას სათავეში ოპოზიციური მოძრაობის ლიდერი, ნიკოლ პაშინიანი ჩაუდგა. ხელისუფლებაში მოსვლისთანავე მიზნად მან ვადამდელი საპარლამენტო არჩევნები დაისახა.

ვადამდელი საპარლამენტო არჩევნების დასანიშნად ტაქტიკური მიზეზებით პაშინიანი 16 ოქტომბერს გადადგა. ამის შემდეგ პაშინიანი პრემიერ-მინისტრობის მოვალეობას ასრულებდა.