ბიძინა ივანიშვილმა რეგიონული მედიის წარმომადგენლებთან შეხვედრაზე განაცხადა, რომ აჭარის უმაღლესი საბჭოს შემადგენლობაში ქართული ოცნებიდან, საშუალოდ, 15 დეპუტატის შესვლას მოიაზრებს.

ყოფილი პრემიერი ვარაუდობს, რომ საპარლამენტო არჩევნებში საქართველოს მასშტაბით ქართული ოცნებიდან, საშუალოდ, 100 დეპუტატი გაიმარჯვებს:

"ვერ წარმომიდგენია 90-ზე ნაკლები შევიდეს პარლამენტში ოცნების მხრიდან. უფრო ნაკლებად წარმომიდგენია 90 ვიდრე 115".

ივანიშვილის თქმით, ამის თქმის საფუძველს მას ქართული საზოგადოება აძლევს. მისი განცხადებით, საზოგადოებას შეფასების პრობლემა აქვს და აპირებს ქვეყნის ყველა რეგიონში შეხვდეს მოსახლეობას, რათა მათ ანალიზში დაეხმაროს.

ის ასევე აცხადებს, რომ სახელმწიფო დონეზე აზროვნება ერთადერთ პარტიას - ქართულ ოცნებას და ერთადერთ პიროვნებას - გიორგი კვირიკაშვილს შეუძლია.

"შეხვედრები რეგიონულ მედიასთან", - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერ-მინისტრი ბიძინა ივანიშვილი მონაწილეობს.

გადაცემას 2030-ის ჟურნალისტები ნათია თოიძე და მიხეილ ფეიქრიშვილი უძღვებიან. პროექტის პირველი გადაცემა 1 სექტემბერს, 12:00 საათზე აჭარიდან გავიდა GDS-ის პირდაპირ ეთერში.