გორში მოკლული 9 წლის გოგოს ოჯახის ადვოკატი აცხადებს, რომ ექსპერტიზის დასკვნით საქმეში არსებულ მტკიცებულებებზე ბრალდებულის, იაგო ნებიერიძის დნმ-ის კვალი არ აღმოჩნდა. საუბარია იმ ურიკაზე, რომლითაც, სავარაუდოდ, ცხედარი მკვლელობის ადგილიდან მდინარის ნაპირამდე მიიტანეს.

ადვოკატის თქმით, გამოძიება მუშაობდა ვერსიაზე, რომ ნებიერიძემ მკვლელობის შემდეგ ხელი სარეცხი საშუალებით დაიბანა, თუმცა ექსპერტიზის დასკვნით ბრალდებულის დნმ-ის კვალი, არც ბოთლზე აღმოჩნდა. მისი თქმით, ვერ გამორიცხავენ იმ ფაქტსაც, რომ მკვლელობაში ნებიერიძეს სხვა პირი ეხმარებოდა. მისივე თქმით, ეს გამოძიებამ უნდა დაადასტუროს.

რუსთავი 2-ის ინფორმაციით, ექსპერტიზის დასკვნით ცნობილი გახდა, რომ გარდაცვლილი გოგო არა თავის არეში ჭრილობით, არამედ გაგუდვის შედეგად გარდაიცვალა.

იაგო ნებიერიძეს გორში მიმდინარე წლის 25 ოქტომბერს გაუჩინარებული 9 წლის ნანა ბერიაშვილის გატაცებასა და მკვლელობაში ედება ბრალი. ბავშვის ცხედარი იმავე დღეს საღამოს მდინარე ლიახვის ნაპირზე იპოვეს. ახლობლები ყვებიან, რომ გოგო ხელ-ფეხშეკრული იპოვეს.

გამოძიება წინასწარი შეცნობით არასრულწლოვნის მიმართ დამამძიმებელ გარემოებაში ჩადენილი განზრახ მკვლელობის ფაქტზე, საქართველოს სისხლის სამართლის კოდექსის 109-ე მუხლის მე-2 ნაწილის "ბ" ქვეპუნქტით მიმდინარეობს. გარდა ამისა, ბრალდებულს ბრალი დაუმძიმდა სისხლის სამართლის კოდექსის 141-ე მუხლით დაუმძიმდა, რაც გარყვნილ ქმედებას გულისხმობს.

ამასთანავე გამოძიება გრძელდება 14 წლის წინ გაუჩინარებული 11 წლის მოზარდის საქმეზეც.

შეწყალების კომისიის თავმჯდომარის, ზვიად ქორიძის განცხადებით, 9 წლის გოგოს მკვლელობაში ბრალდებული შეწყალებული იყო.