გორში მოკლული 8 წლის გოგო საქმეზე დაკავებულს, იაგო ნებიერიძეს ბრალი სისხლის სამართლის კოდექსის 141-ე მუხლით დაუმძიმდა, რაც გარყვნილ ქმედებას გულისხმობს. ამის შესახებ ჟურნალისტებს მოკლული გოგოს დაკრძალვაზე მისულმა შინაგან საქმეთა მინისტრის მოადგილემ, კახა საბანაძემ განუცხადა.

მინისტრის მოადგილემ მკვლელობის საქმის დამატებით დეტალებზეც ისაუბრა და თქვა, რომ გამოძიებას მყარი მტკიცებულებები აქვს. გამოძიება ასევე გრძელდება 14 წლის წინ გაუჩინარებული 11 წლის მოზარდის საქმეზეც.

ნანა ბერიაშვილის მკვლელობის საქმეზე შსს-მ ბრალდებული დააკავა. გამოძიება წინასწარი შეცნობით არასრულწლოვნის მიმართ დამამძიმებელ გარემოებაში ჩადენილი განზრახ მკვლელობის ფაქტზე, საქართველოს სისხლის სამართლის კოდექსის 109-ე მუხლის მე-2 ნაწილის "ბ" ქვეპუნქტით მიმდინარეობს. შეწყალების კომისიის თავმჯდომარის, ზვიად ქორიძის განცხადებით, 9 წლის გოგოს მკვლელობაში ბრალდებული შეწყალებული იყო.

9 წლის ნანა ბერიაშვილი 25 ოქტომბერს შუადღით ცეკვაზე წავიდა და მას შემდეგ აღარავის უნახავს. ცხედარი შემდეგ იმავე დღეს საღამოს მდინარე ლიახვის ნაპირზე იპოვეს. ახლობლები ყვებიან, რომ გოგო ხელ-ფეხშეკრული იპოვეს.