გორში ცხრა წლის გოგო მოკლული იპოვეს. რუსთავი 2-ის ინფორმაციით, ცხედარი გორის რაიონული სასამართლოს ეზოშია ნაპოვნი. გოგო სახლიდან დღის პირველ ნახევარში, ცეკვაზე წავიდა და ამის შემდეგ აღარვის უნახავს.

შინაგან საქმეთა სამინისტროს ინფორმაციით, გორში დაკარგული ცხრა წლის გოგოს ცხედარი მდინარე ლიახვის ნაპირთან იპოვეს. მათივე თქმით, მომხდარ ფაქტზე გამოძიება სპეციალურმა საგამოძიებო ჯგუფმა დაიწყო, რომელსაც შინაგან საქმეთა მინისტრის პირველი მოადგილე, კახა საბანაძე ხელმძღვანელობს.

ადგილზე, სამართალდამცველებთან ერთად, შიდა ქართლის გუბერნატორი, გიორგი ხოჯევანიშვილი და ადგილობრივი ხელისუფლების სხვა წარმომადგენლები იმყოფებიან. ამ დროისთვის ადგილზე ექსპერტ-კრიმინალისტები მუშაობენ. ცხედარს კომპლექსური ექსპერტიზა ჩაუტარდება.