შეწყალების კომისიის თავმჯდომარე, ზვიად ქორიძე აღნიშნავს, რომ გორში 9 წლის გოგოს მკვლელობაში ბრალდებული მანამდე ნასამართლევი იყო. მისი განმარტებით, ამ შინაარსის განცხადების გავრცელების მიზანი მაღალი საჯარო ინტერესია. ქორიძის კომენტარი On.ge-ს პრეზიდენტის ადმინისტრაციამ გამოუგზავნა.

როგორც კომენტარიდან ირკვევა, გორში 25 ოქტომბერს მომხდარი მკვლელობის ფაქტზე ბრალდებულის საქმე შეწყალების კომისიამ განიხილა 2016 წლის დეკემბერში. ის სასჯელს იხდიდა 2008 წლის 29 სექტემბრიდან ძარცვისა და ყაჩაღობის მუხლებით და მიესაჯა 18 წელი და ოთხი თვე. მოგვიანებით, სააპელაციო სასამართლომ მსჯავრი შეუმცირა 17 წლამდე და 4 თვემდე. 2012 წლის ამნისტიის კანონით კი მსჯავრი შეუმცირდა 10 წლამდე, ანუ სასჯელი შეუმცირდა შვიდი წლით და ოთხი თვით. ქორიძე განმარტავს, რომ შეწყალების საქმის განხილვის მომენტისთვის ცხრა წლის მკვლელობაში ბრალდებულს მოხდილი ჰქონდა რვა წელი და სამი თვე. მოსახდელი რჩებოდა ორი წელი და სამი თვე.

"კომისიამ იმსჯელა და ერთხმად გადაწყვიტა, რომ პრეზიდენტისთვის შეეთავაზებინა დადებითი რეკომენდაცია. კომისიის რეკომენდაცია განაპირობა შემდეგმა ფაქტორებმა: საპატიმრო დაწესებულებიდან ჰქონდა დადებითი დახასიათება; მოხდილი ჰქონდა სასჯელის ძალიან დიდი ნაწილი; ჯანმრთელობის ცნობასა და ფსიქოლოგის დასკვნაში არაფერი იყო ნათქვამი რაიმე ტიპის ფსიკური ჯანმრთელობის პრობლემასა და აგრესიულ ხასიათზე, რასაც შეეძლო საზოგადოებისთვის ზიანი მოეტანა; სასჯელაღსრულების დაწესებულებიდან გამოგზავნილ დოკუმენტებში დადასტურებული იყო, რომ მსჯავრის მოხდის დროს (2008 წლიდან) იგი იყო წამებისა და არაადამიანური მოპყრობის მსხვერპლი", — განმარტავს ზვიად ქორიძე და დასძენს, რომ პრეზიდენტმა არ გაიზიარა კომისიის რეკომენდაცია სრულ გათავისუფლებასთან დაკავშირებით და მას დარჩენილი საპატიმრო სასჯელიდან მხოლოდ წელი და ერთი თვე.

9 წლის ნანა ბერიაშვილი 25 ოქტომბერს შუადღით ცეკვაზე წავიდა და მას შემდეგ აღარავის უნახავს. ცხედარი შემდეგ იმავე დღეს საღამოს მდინარე ლიახვის ნაპირზე იპოვეს. ახლობლები ყვებიან, რომ გოგო ხელ-ფეხშეკრული იპოვეს.