"ეს იყო მცდელობა, რომ ჩემი კომიტეტის თავმჯდომარეობიდან წასვლის მომხიბვლელი გზა ეჩვენებინათ", — ასე გამოეხმაურა იურიდიულ საკითხთა კომიტეტის ყოფილი თავმჯდომარე, ეკა ბესელია მისთვის პარლამენტის ვიცე-სპიკერის თანამდებობის შეთავაზებას.

ეკა ბესელიას თქმით, იდეა მისთვის ვიცე-სპიკერის სკამი შეეთავაზებინათ ირაკლი კობახიძეს ეკუთვნის, თუმცა ფიქრობს, რომ ის არ იყო მარტო "ამ იდეის მოფიქრების დროს".

"მე გამეღიმა და ვთქვი, რომ მე არ მაინტერესებს თანამდებობები მე კომფორტისთვის პოლიტიკაში არ მოვსულვარ. მე ვთქვი, რომ ჩემთვის არ არის საინტერესო კომფორტის ზონაში გადასვლა, ჩემთვის მთავარი იყო, რატომ კეთდებოდა ეს. მე მზად ვარ, წავიდე პოლიტიკიდან, წავიდე სახლში არა თუ თანამდებობა დავტოვო, მაგრამ უნდა ვიყო დარწმუნებული, რომ ეს სამართლიანობის იდეას არ გაამრუდებს და ჩვენ არ ვტოვებთ თანამდებობას ზარდიაშვილის ხელში", — განაცხადა ეკა ბესელიამ.

პარლამენტის თავმჯდომარის, ირაკლი კობახიძის განცხადებით, ეკა ბესელიასთვის ვიცე-სპიკერების ფლიგელში კაბინეტის მომზადება დაიწყო სექტემბერში, აგვისტოში მიღებული გადაწყვეტილებიდან გამომდინარე. ირაკლი კობახიძის თქმით, აგვისტოში მოსამართლეების თემა აქტუალური არ იყო და ამიტომ ფიქრობს, რომ ბესელიას გადაწყვეტილება არავითარ კავშირში არ იყო სასამართლოს საკითხთან.

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

მიუხედავად იმისა, რომ დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა შეარჩიოს, უზენაესი სასამართლოს მოსამართლეობის 10 კანდიდატი უკვე წარდგენილია. ამის გამო, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იურიდიულ საკითხთა კომიტეტის პირველ მოადგილედ გედევან ფოფხაძე 31 დეკემბერს აირჩიეს. საქართველოს პარლამენტის თავმჯდომარე ფიქროს, რომ მისი არჩევა რეგლამენტის დარღვევით მოხდა. ეკა ბესელიას თქმით, რეგლამენტს კარგად იცნობს და იმოქმედა წესების შესაბამისად.

ამასთანავე, პარლამენტის თავმჯდომარემ განაცხადა, რომ თუ ვინმე წავა ქართული ოცნების გუნდის წინააღმდეგ, ამას პასუხი აუცილებლად გაეცემა.