იურიდიულ საკითხთა კომიტეტის ყოფილი თავმჯდომარის, ეკა ბესელიას განცხადებით, მისი მონაწილეობით უმრავლესობის სხდომის ჩატარებას მოითხოვს. როგორც ბესელიამ ტვ პირველთან სატელეფონო საუბრისას განაცხადა, ფრაქციასთან კომიტეტიდან გედევან ფოფხაძის გაწვევის საკითხი აქვს გასარკვევი.

გარდა ამისა ბესელიამ აღნიშნა, რომ პარლამენტში ქართული ოცნების ფრაქციის თავმჯდომარე, მამუკა მდინარაძე კომიტეტეში მოსამართლეების საკითხის განხილვას მხარს უჭერდა.

"რა თქმა უნდა, ეს არის ფასეულობათა და ღირებულებათა შეუთავსებლობა. მე გადავხედავ ფრაქციასა და ჩემი ურთიერთობის საკითხს, როდესაც ამაზე ვისაუბრებ ჩემი ჩამოსვლის შემდეგ. გავარკვევ დეტალებს, რატომ მოხდა გადაწყვეტილების ასეთი ფორმით მიღება", — განაცხადა ბესელიამ.

დეპუტატმა იურიდიულ საკითხთა კომიტეტის ყოფილ პირველ მოადგილესთან, ვანო ზარდიაშვილთან უთანხმოებაზეც ისაუბრა. ბესელიას მიაჩნია, რომ ზარდიაშვილის მოადგილეობა უსამართლო და არასწორი იყო:

"ეს უკავშირდებოდა ისევ სასმაართლო საკითხებს. მე არ ვაპირებდი გადადგომას ამ უთანხმოების გამო. გადაწყვეტილება მივიღე ოთხშაბათს [26 დეკემბერს], დილით".

ბესელიას განმარტებით, ფრაქციაში მიმდინარე პროცესებმა არ შეიძლება, ბიძინა ივანიშვილი დააზიანოს.

"მას აზიანებს ის მლიქვნელური დამოკიდებულება, მაამებლური და საკუთარი ინტერესებით ნაკარნახევი დამოკიდბეულება, რომელიც ჩანს ამ ვიწრო ჯგუფში. ბიძინა ივანიშვილს არ აზიანებს ეს პროცესი, რომელიც არის კეთილშობილური მიზნით, რომელიც არის ზრუნვით განპირობებული", — აღნიშნა ბესელიამ.

3 იანვარს ფოფხაძეს ქართული ოცნების ფრაქციამ იურიდიულ საკითხთა კომიტეტი დაატოვებინა და შესაბამისად, ის აღარ არის კომიტეტის თავმჯდომარის პირველი მოადგილე.

პარლამენტის დეპუტატის, მამუკა მდინარაძის განცხადებით, გედევან ფოფხაძე იურიდიულ საკითხთა კომიტეტიდან ორი მიზეზით გაიწვიეს — პროცედურული დარღვევები და შეუთანხმებელი კანდიდატურა.

მდინარაძის განმარტებით, ფოფხაძე კომიტეტის პირველ მოადგილედ რეგლამენტის დარღვევით აირჩიეს, გარდა ამისა მისი კანდიდატურა ფრაქციასთან შეუთანხმებელი იყო.

ეკა ბესელია ამბობს, რომ ფოფხაძის კომიტეტიდან გაწვევით მის მიმართ უმრავლესობამ სადამსჯელო ღონისძიება გაატარა. ოცნებაში დაპირისპირება სწორედ ბესელიას მიერ თანამდებობის დატოვების შემდეგ დაიწყო.

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

მიუხედავად იმისა, რომ დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა შეარჩიოს, უზენაესი სასამართლოს მოსამართლეობის 10 კანდიდატი უკვე წარდგენილია. ამის გამო, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იურიდიულ საკითხთა კომიტეტის პირველ მოადგილედ გედევან ფოფხაძე 31 დეკემბერს აირჩიეს. საქართველოს პარლამენტის თავმჯდომარე ფიქროს, რომ მისი არჩევა რეგლამენტის დარღვევით მოხდა. ეკა ბესელიას თქმით, რეგლამენტს კარგად იცნობს და იმოქმედა წესების შესაბამისად.

ამასთანავე, პარლამენტის თავმჯდომარემ განაცხადა, რომ თუ ვინმე წავა ქართული ოცნების გუნდის წინააღმდეგ, ამას პასუხი აუცილებლად გაეცემა.