ქუთაისსა და გორში პიროტექნიკის გამოყენების შედეგად სულ 16 ადამიანი დაშავდა.

31 დეკემბრიდან 2 იანვრამდე პერიოდში გორის ცენტრალურ საავადმყოფოში პიროტექნიკის არასწორი გამოყენების გამო მიღებული დაზიანებებით 5 პაციენტი მოხვდა, აქედან 4 ბავშვია. ქუთაისში პიროტექნიკის გამოყენებით მიღებული დაზიანებებით 4 ადამიანი მკურნალობს. მსგავსი დაზიანებებით კი 31 დეკემბრიდან 2 იანვრამდე ქუთაისის საავადმყოფოებს 11-მა ადამიანმა მიაკითხა. იმავე მიზეზით კახეთის საავადმყოფოებში 4 პაციენტი შეიყვანეს.

იაშვილის კლინიკაში პიროტექნიკით დაზარალებულ ბავშვს თითების ამპუტაცია ჩაუტარდა. სულ იაშვილის კლინიკაში პიროტექნიკით დაშავებული 12 ბავშვია მოთავსებული, მათგან მხოლოდ ერთია ბათუმიდან, დანარჩენი — თბილისიდან. კლინიკის განმარტებით, მოზარდები 10-დან 13 წლამდე ასაკის არიან და სხვადასხვა სახის დაზიანება აღენიშნებათ.

საგანგებო სიტუაციების მართვის სამსახურის ინფორმაციით, ახალი წლის ღამეს ქვეყნის მასშტაბით პიროტექნიკის დაზიანების გამო ხუთი შეტყობინება მიიღეს. აქედან, 3 შემთხვევა ბათუმიდან იყო, 2 — თბილისიდან.

ბათუმში ევროპის მოედანზე ფოიერვერკის აფეთქების შედეგად 4 ადამიანი დაშავდა, მათ შორის 2 ტურისტი.