ბათუმში, ევროპის მოედანზე ფოიერვერკის აფეთქების შედეგად 4 ადამიანი დაშავდა, მათ შორის 2 ტურისტი. აჭარის ტელევიზია თვითმხილველებზე დაყრდნობით აცხადებს, რომ სავარაუდოდ პიროტექნიკა საყრდენიდან გადმოვარდა და არასწორი მიმართულებით გაისროლა.

როგორც ბათუმის რესპუბლიკური საავადმყოფოს დირექტორი მალხაზ ხალვაში ამბობს, კლინიკაში შეყვანილებს ზედაპირული დაზიანებები აღენიშნებოდათ და მათ უკვე გაეწიათ შესაბამისი დახმარება. ექიმის განცხადებით, ერთ-ერთ ტურისტს დაზიანებული ჰქონდა თვალის ქუთუთო და წარბი.

აჭარის ჯანდაცვის მინისტრის, ზაალ მიქაძის ინფორმაციით, აჭარის მასშტაბით პიროტექნიკით დაიზანების რამდენიმე შემთხვევა გამოვლინდა. მისი თქმით, საავადმყოფოს მოქალაქეები ძირითადად მტევნის და თითების დამწვრობებით მიმართავენ.

გამოძიება სისხლის სამართლის კოდექსის 124-ე მუხლით დაიწყო, რაც ჯანმრთელობის გაუფრთხილებლობით დაზიანებას გულისხმობს.