თბილისის სააპელაციო სასამართლოს მოსამართლის, ლევან მურუსიძის თქმით, სასამართლო სისტემაში "არანაირი კლანი არ არსებობს". ამის შესახებ მოსამართლემ განაცხადა იუსტიციის უმაღლესი საბჭოს სხდომაზე, სადაც მისი უვადოდ გამწესების საკითხს განიხილავენ.

მურუსიძის უვადოდ გამწესებას არ ეთანხმებიან საბჭოს არამოსამართლე წევრები, ანა დოლიძე და ნაზი ჯანეზაშვილი. ისინი ამბობენ, რომ მურუსიძე ე.წ. ჩინჩალაძის კლანის წევრია. მურუსიძემ განმარტა, რომ ის არავისთან არ არის კავშირში და იმ სასამართლოს ლიდერია, რომელიც "აერთიანებს მოსამართლეებს იმ თემებზე საბრძოლველად, რასაც ჰქვია სასამართლოს რეალური დამოუკიდებლობა".

გასაუბრებაზე მურუსიძემ განაცხადა, რომ ბოლო რამდენიმე წელია სანდრო გირგვლიანის საქმის გამო მას უსამართლოდ აკრიტიკებენ. მისივე თქმით, სასამართლო სისტემა დამოუკიდებლობისკენ მიდის და ამ მხრივ დიდი ნაბიჯია გადადგმული.

ვინ არის მიხეილ ჩინჩალაძე

მიხეილ ჩინჩალაძე ის მოსამართლეა, რომელსაც სხვადასხვა მედიამ საგამოძიებო მასალები და ბევრი კრიტიკული სტატია მიუძღვნა. სტუდია მონიტორის საგამოძიებო ფილმში "ჩინჩალაძის კლანი — სასამართლო სისტემის კრახი", საუბარია ჩინჩალაძის გავლენაზე სასამართლოში, მის კავშირზე ქართული ოცნების დეპუტატ, ვანო ზარდიაშვილთან და კლანურ მმართველობაზე, რომელმაც გახმაურებულ საქმეებზე გავლენა მოახდინა. ჩინჩალაძის რეპუტაციასა და კავშირებზე წლებია კითხვები უჩნდება არასამთავრობო სექტორსაც.

ამჟამად ის თბილისის სააპელაციო სასამართლოს თავმჯდომარეა. ჩინჩალაძე 2007 წლის ივნისიდან 2017 წლამდე საქართველოს უზენაესი სასამართლოს წევრი იყო. არასამთავრობო ორგანიზაციების, კონსტიტუციის 42-ე მუხლის, საერთაშორისო გამჭვირვალობა —საქართველოსა და სამართლიანი არჩევნების ინფორმაციით, მიხეილ ჩინჩალაძემ 10-წლიანი კარიერის მანძილზე მხოლოდ 250 საქმე განიხილა, რაშიც ოფიციალური მონაცემებით, მილიონ ლარზე მეტი სარგო და პრემია-დანამატი აიღო.

მას 2004-2007 წლებში მცხეთა-მთიანეთის საოლქო პროკურორის თანამდებობა ეკავა. 2005 წლის მაისში ის მიხეილ სააკაშვილმა ღირსების ორდენით დააჯილდოვა. მიხეილ ჩინჩალაძემ 250 საქმიდან 220 სწორედ ნაციონალური მოძრაობის მმართველობის დროს 2007-2008 წლებში განიხილა.

ამავე თემაზე: