სააპელაციო სასამართლოს მოსამართლემ, ლევან მურუსიძემ განაცხადა, რომ "მზად არის იუსტიციის საბჭოს წინაშე გირგვლიანის საქმესთან დაკავშირებით ყველა კითხვას პასუხი გასცეს". ამის შესახებ ლევან მურუსიძემ საბჭოს სხდომის დაწყებამდე განაცხადა, სადამ მის უვადოდ გამწესების საკითხს განიხილავენ

მოსამართლე მურუსიძემ აღნიშნა, რომ ორი წლის განმავლობაში პოლიტიკური პარტიები გირგვლიანის საქმეზე მას აწმენდნენ ხელს. ის მზად არის სისხლის სამართლის პროცესის მცოდნე ნებისმიერ ადამიანთან განიხილოს ეს საქმე. მისი მტკიცებით, იმ პირობებში გირგვლიანი საქმეზე სხვა დასკვნას ვერავინ გამოიტანდა.

"თუნდაც მოხდეს ლევან მურუსიძის ერთგვარი გასამართლება ამ საქმესთან დაკავშირებით და ერთხელ და სამუდამოდ მომეცეს იმის საშუალება დავამტკიცო, რომ ადამიანმა, რომელსაც მსჯავრდებულებს მივუსაჯე 7 წელი, არ ვარ ამ საქმეში მთავარი დამნაშავე და არ არის ლევან მურუსიძე ის ადამიანი, რომელმაც გირგვლიანის მკვლელები გაუშვა ციხიდან", — განაცხადა მურუსიძემ.

მან აღნიშნა, რომ ამ საქმეზე ორი სხვა მოსამართლეც მუშაობდა, მაგრამ ამ მოსამართლებიის მიმართ პრეტენზია არასოდეს არ გამოუთქვამთ.

"მზად ვარ, რომ ნებისმიერ ტელევიზიაში გამოვიდე. ორი წლის განმავლობაში, მე პირადად ამის პრობლემა არა მაქვს, ამას გავუძლებ, მაგრამ ჩემი ოჯახი, ჩემი ახლობლები განიცდიან მუდმივ წნეხს. ბრალდებულსაც კი, რომელსაც მკვლელობაში ედება ბრალი აქვს იმის უფლებები, რომ თავისი თავი დაიცვას", — აღნიშნა მურუსიძემ.

ლევან მურუსიძის თქმით, ის აპირებს საბჭოს ანგარიში ჩააბაროს მისი სხვა გადაწყვეტილებების შესახებ.

"მოსამართლეს კონსტიტუციის თანახმად არ შეიძლება მოსთხოვო საქმეზე ანგარიში, მაგრამ მე დღეს მოვედი, ჩემი ნებით მინდა, რომ ჩავაბარო ეს ანგარიში თუ იქნება ამ საქმეებზე შესაბამისი კითხვები", — განაცხადა მურუსიძემ. მისი თქმით, სურს ეს პროცესი პირდაპირ ეთერში გაშუქდეს, რათა საზოგადოებამ გაიგოს, რომ "თითიდან გამოწოვილი ბრალდებებით" ედავებიან.

ლევან მურუსიძე არაერთ გახმაურებულ საქმესთან არის დაკავშირებული, როგორც წინა ხელისუფლების დროს, ისე ახლა. ნაციონალური მოძრაობის მმართველობის დროს მან განიხილა სანდრო გირგვლიანის მკვლელობის საქმე, მოქმედი ხელისუფლების დროს კი აიისას საქმე.

გაიგეთ მეტი: