"ეს არის ქალბატონი ეკას პირადი პოზიცია. ამის უფლება აქვს და გააკეთა განმარტება", — ასე შეაფასა საქართველოს პრემიერ-მინისტრმა, მამუკა ბახტაძემ ეკა ბესელიას მიერ კომიტეტის თავმჯდომარის პოსტის დატოვების მიზეზი.

ეკა ბესელიას თქმით, კომიტეტს უზენაესი სასამართლოს მოსამართლეობის კანდიდატების გამო ტოვებს და ამ გადაწყვეტილებით შერჩევის პროცესს აჩერებს.

მამუკა ბახტაძე კი "საეჭვო მოსამართლეების" კანდიდატთა სიაში ყოფნას ასე ეხმაურება:

"აღმასრულებელი ხელისუფლება სხვა სახელისუფლებო შტოში მიმდინარე პროცესებში არ უნდა ჩაერიონ. თქვენ მოგეწონებათ, როგორც ხდებოდა, ქვეყნის პირველი პირები ურეკავდნენ მოსამართლეებს და თავის აზრს ეუბნებოდნენ? ეს არის სრულიად მიუღებელი, ჩვენ ვაშენებთ სამართლებრივ ქვეყანას, ჩვენს გვაქვს გამართული კონსტიტუცია და ამის ფარგლებში უნდა ვიმუშავოთ,", — განაცხადა მამუკა ბახტაძემ.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი უკვე დაასახელა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

დასახელებულ კანდიდატებს შორის არიან: თამარ ალანია; მერაბ გაბინაშვილი; დიმიტრი გვრიტიშვილი; გიორგი მიქაუტაძე; ნინო სანდოძე; პაატა სილაგაზე; გიორგი ტყავაძე; ნინო ქადაგიძე; მიხეილ ჩინჩალაძე; მარიამ ცისკაძე.

იუსტიციის საბჭოს არამოსამართლე წევრი, ნაზი ჯანეზაშვილი და არასამთავრობო სექტორის ნაწილი მათ "ჩინჩალაძის კლანად" მოიხსენიებს.

იუსტიციის უმაღლესი საბჭოს მოსამართლეები აცხადებენ, რომ კანდიდატებად ღირსეული და კომპეტენტური პირები შეარჩიეს. საქართველოს პარლამენტის თავმჯდომარის, ირაკლი კობახიძის განცხადებით, საქართველოს პარლამენტმა მიიღო გადაწყვეტილება და კანდიდატების სიას საგაზაფხულო სესიაზე განიხილავს.

გაიგე მეტი: