იუსტიციის უმაღლესმა საბჭომ საქართველოს უზენაესი სასამართლოს წევრობის 10 კანდიდატი დაასახელა. კანდიდატების სია საბჭოს არამოსამართლე წევრმა, ნაზი ჯანეზაშვილმა გამოაქვეყნა. აღნიშნულ კანდიდატებს იუსტიციის უმაღლესი საბჭო დასამტკიცებლად პარლამენტს გადაუგზავნის.

• მიხეილ ჩინჩალაძე;
• გიორგი მიქაუტაძე;
• მარიამ ცისკაძე;
• ნინო ქადაგიძე;
• პაატა სილაგაძე;
• დიმიტრი გვრიტიშვილი;
• მერაბ გაბინაშვილი;
• ნინო სამნიძე;
• თამარ ალანია;
• გიორგი თავაძე.

საბჭოს სამმა წევრმა: ანა დოლიძემ, ნაზი ჯანეზაშვილმა და ირმა გელაშვილმა კენჭისყრაში მონაწილეობა არ მიიღეს.

იუსტიციის უმაღლესი საბჭოს წევრი, ნაზი ჯანეზაშვილი საბჭოს სხდომაზე თავის ორი თვის შვილთან ერთად მივიდა. ასე გამოხატა პროტესტი იმ მოსამართლეების მიმართ, რომელსაც ის "ჩინჩალაძის კლანის" წევრებად მოიხსენიებს.

იუსტიციის საბჭოს 17 დეკემბრის სხდომაზე ჯანეზაშვილმა წარადგინა პროექტი, რომელიც კანდიდატების შესარჩევად ღია კონკურსის გამოცხადებას და საკონსულტაციო ჯგუფის შექმნას ითვალისწინებდა. საბჭოს წევრებმა კენჭი არ უყარეს არც საკითხის მიღებას და არც მის გადადებას.

სალომე ზურაბიშვილის ინაუგურაციის შემდეგ ძალაში შევიდა კონსტიტუციის ახალი რედაქცია. ამ რედაქციით, საქართველოს უზენაესი სასამართლოს მოსამართლეებს პრეზიდენტის ნაცვლად, იუსტიციის უმაღლესი საბჭო წარადგენს. მათ თანამდებობაზე უვადოდ აირჩევს საქართველოს პარლამენტი. იმავე წესით აირჩევენ საქართველოს უზენაესი სასამართლოს თავმჯდომარეს, 10 წლის ვადით.

უზენაესი სასამართლოს მოსამართლეების არჩევის საკითხს გამოეხმაურა კოალიცია გამჭვირვალე მართლმსაჯულებისთვის. კოალიცია დადებითად აფასებს საქართველოს პარლამენტის ახალი რეგლამენტის 205-ე მუხლის ფორმულირებას, რომელიც გულისხმობს სამუშაო ჯგუფის შექმნას პარლამენტში, სადაც უზენაესი სასამართლოს მოსამართლეობის კანდიდატებს მოუსმენენ და გამჭვირვალე ფორმატში განიხილავენ. თუმცა აქვე აღნიშნავენ, რომ სამუშაო ჯგუფი პროფესიული წრეებისა და სამოქალაქო საზოგადოების იმ წევრებით უნდა დაკომპლექტდეს, რომელიც დემოკრატიულ პრინციპებსა და ადამიანის უფლებათა ღირებულებებს აღიარებენ.

კოალიცია მიიჩნევს, რომ იქამდე, სანამ ორგანულ კანონში ცვლილება არ შევა უზენაესი სასამართლოს მოსამართლეები არ უნდა აირჩიონ:

• მოვუწოდებთ საქართველოს პარლამენტს, დაუყოვნებლივ დაიწყოს მუშაობა საერთო სასამართლოების შესახებ ორგანულ კანონში განსახორციელებელ ცვლილებებზე;
• მოვუწოდებთ საქართველოს იუსტიციის უმაღლეს საბჭოს, თავი შეიკავოს კანდიდატთა ნომინირებისაგან შესაბამისი საკანონმდებლო ცვლილებების განხორციელებამდე.