ქართული თხილი ბულგარეთის საზღვარზე ტოქსიკური ნივთიერების, აფლატოქსინების დიდი რაოდენობის გამო არ დაუშვეს. შესაბამისი შეტყობინება ევროკომისიის ვებსაიტზე ბოლოს 17 დეკემბერს გამოქვეყნდა, სადაც მითითებულია რომ რისკის მაჩვენებელი "სერიოზულია".

2018 წელს რვა შემთხვევა დაფიქსირდა, როდესაც ბულგარეთში ქართული თხილი არ დაუშვეს. ყველა შეტყობინებაში უარის მიზეზად აფლატოქსინების გადამეტებული რაოდენობა ფიქსირდება.

სურსათის ეროვნული სააგენტოს განცხადებაში ნათქვამია, რომ თხილში აფლატოქსინების შემცველობაზე ევროკომისიის სწრაფი განგაშის სისტემით (RASFF) 2018 წელს მხოლოდ 6 შეტყობინება მიიღეს. ევროკომისიის სწრაფი განგაშის სისტემით (RASFF) შეტყობინებები თხილში აფლატოქსინების შემცველობაზე ყოველწლიურად ეგზავნება თხილის მწარმოებელ ქვეყნებს.

აფლატოქსინები სიცოცხლისთვის სახიფათო მიკოტოქსინებია. სურსათის უვნებლობის ექსპერტი, ქეთევან დადიანი On.ge-სთან საუბარში განმარტავს, რომ ეს ნივთიერება ადამიანის ორგანიზმში აბსულუტურად ყველა უჯრედზე მოქმედებს და აზიანებს მათ. მისივე თქმით, ეს ტოქსინები განსაკუთრებით მოქმედებს ღვიძლის უჯრედებზე და კიბოს კვლევის საერთაშორისო სააგენტოს მიერ აღიარებულია პირველი ჯგუფის კარცენოგენად.

სურსათის უვნებლობის ექსპერტი ხსნის, რომ შეიძლება წლების მერე იჩინოს თავი მომწამლავი ნივთიერების შედეგად გამოწვეულმა დაავადებამ:

"ისეთ დოზას ვერავინ მიიღებს, რომ იმ წუთშივე რაღაც ეფექტი ჰქონდეს მას. საქმე იმაშია, რომ ეს ნივთიერებები არა მწვავე მოქმედების ხასიათით გამოირჩევიან, რეალობაში, უფროი მეტად მათი ქრონიკული ზემოქმედება აქვთ თვეების განმავლობაში".

თხილის დაბინძურება აფლატოქსინებით შესაძლებელია გამოიწვიოს ასევე ტრანსპორტირებისას არასათანადო პირობებმა. მნიშვნელოვანია აგროღონისძიებების დროულად და სწორად ჩატარება, შესაბამისი წესების დაცვა მოკრეფის, დასაწყობების და შრობის პროცესში.

2016 წლის ივნისიდან თხილის შესახებ ტექნიკური რეგლამენტი ამოქმედდა, რომელიც თხილის ექსპორტის, იმპორტის, ხარისხისა და ეტიკეტირების საკითხებს უნდა არეგულირებდეს.

2017 წელს შეტანილი ცვლილებების მიხედვით, 2018 წლიდან ბიზნესოპერატორი, რომელიც ექსპორტისთვის გადამუშავებულ თხილსა და თხილის გულს ამზადებს, ვალდებულია დანერგოს საფრთხის ანალიზისა და კრიტიკული საკონტროლო წერტილების (HACCP – Hazzard Analysis and Critical Control Points) პრინციპებზე დაფუძნებული სისტემა, რომელსაც სურსათის ეროვნული სააგენტო აკონტროლებს.