გურჯაანის რაიონულ სასამართლოსთან მიმდინარე აქციაზე, გაერთიანებული ოპოზიციის ერთ-ერთმა ლიდერმა, ზაალ უდუმაშვილმა სიტყვით გამოსვლისას ქალი პოლიციელების წინა ხაზში ჩაყენებაზე ისაუბრა. მან თქვა, რომ შსს-მ "ქალბატონები ჩაამწკრივა წინა რიგებში", შემდეგ კი სექსისტური შინაარსის განცხადება დაამატა: "შემდეგ პროცესზე რას უნდა ველოდოთ, პატარა ბავშვებს ჩააცმევენ პოლიციის ფორმებს და იმათ დააყენებენ? არ ვიცი, ალბათ, ამათ მახინჯ ფანტაზიას ზღვარი აღარ აქვს".

ცოტა ხნის შემდეგ აქციის მონაწილეებმა სასამართლოს ეზოში მდგაქ ქალ პოლიციელებს ყვავილები მიართვეს. მას შემდეგ, რაც სამართალდამცავებმა ყვავილები არ აიღეს, ოპოზიციის მხარდამჭერებმა სასამართლოს ჭიშკარზე დაამაგრეს ისინი.

ფოტო: თამუნა გეგიძე / On.ge

გურჯაანის რაიონის სასამართლოსთან, სადაც რამდენიმე წუთში დავით კირკიტაძის პროცესი უნდა დაიწყოს, გაერთიანებული ოპოზიციის აქვის მიმდინარეობს. სასამართლოს ეზოში პოლიციაა მობილიზებული.

სასამართლომ, დღეს პროკურატურის შუამდგომლობა უნდა განიხილოს, რომელიც დავით კირკიტაძისთვის აღკვეთის ღონისძიების სახით პატიმრობას ითხოვს.

17 დეკემბერს პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის ერთიანი ნაციონალური მოძრაობის წევრი, დავით კირკიტაძე დააკავეს. ის ბრალს არ აღიარებს და პროტესტის ნიშნად შიმშილობს.