საქართველოს შინაგან საქმეთა სამინისტრომ ვაკეში მომხდარი ურთიერთშელაპარაკების ფაქტზე სამი პირი დააკავა. On.ge-ს ინფორმაციით, ერთ-ერთი დაკავებული ყოფილი პრეზიდენტის, გიორგი მარგველაშვილის სიძის, მინდია გოგოჭურის მეგობარი, დავით კაჭარავაა, რომელსაც უწყება ცეცხლსასროლი იარაღის მართლსაწინააღმდეგო შეძენა-შენახვა-ტარებას ედავება.

შსს-ს ცნობით, თბილისში, ჭავჭავაძის გამზირზე, 16 ნომერში, ურთიერთშელაპარაკება მოხდა დავით კაჭარავასა და ორ პირს შორის, რა დროსაც კაჭარავამ ცეცხლსასროლი იარაღიდან რამდენჯერმე გაისროლა.

"პოლიციამ ნივთმტკიცებად ამოიღო ცეცხლსასროლი იარაღი, რომლიდანაც გაისროლეს. დაპირისპირების მონაწილე სხვა ორმა პირმა სამართალდამცველებს წინააღმდეგობა გაუწია, არ დაემორჩილნენ მათ კანონიერ მოთხოვნას, რის გამოც ორივე პირი დაკავებულია ადმინისტრაციულ სამართალდარღვევათა კოდექსის 166-ე და 173-ე მუხლებით. ეს მუხლები სამართალდამცველის კანონიერი მოთხოვნის დაუმორჩილებლობასა და წვრილმან ხულიგნობას გულისხმობს", — ნათქვამია შსს-ს მიერ გავრცელებულ განცხადებაში.

გამოძიება ცეცხლსასროლი იარაღის მართლსაწინააღმდეგო შეძენა-შენახვა-ტარების ბრალდებით მიმდინარეობს, საქართველოს სისხლის სამართლის კოდექსის 236-ე მუხლით.

მინდია გოგოჭური 6 დეკემბერს საკუთარ სახლში დააკავეს. მას ჯგუფურად ცეცხლსასროლი იარაღისა და საბრძოლო მასალის, მართლსაწინააღმდეგო შეძენა, შენახვის და დანაშაულის წინასწარ შეუპირებლად დაფარვა ედება ბრალად. სასამართლომ გოგოჭურს აღკვეთის ღონისძიების სახით პატიმრობა შეუფარდა.