ქალთა მოძრაობა დიმიტრი გაბუნიას საპარლამენტო მდივნის პოზიციაზე დანიშვნის გასაპროტესტებლად შაბათს აქციას გამართავს. როგორც იდა ბახტურიძემ On.ge-ს განუცხადა აქციის გამართვის ადგილი და დრო ჯერჯერობით უცნობია რადგან საორგანიზაციო საკითხებს ამ დრომდე ათანხმებენ.

ბახტურიძის თქმით, საქართველოს ახალი პრეზიდენტი, რომელიც ქალთა უფლებების დაცვის პირობას დებს ქალთა მოთხოვნებს არ უნდა უგულებელყოფდეს.

"სალომე ზურაბიშვილმა სრულიად დააიგნორა ქალების ის წუხილები, რაც ამ ადამიანის დანიშვნასთან დაკავშირებით იყო. არსებობდა ძალიან სერიოზული არგუმენტები. მისი ღირებულებების მიმართ გვაქვს სერიოზული პრეტენზიები. განსაკუთრებით ქალთა უფლებების კუთხით და სექსუალური შევიწროების პრობლემასთან დაკავშირებით", — განაცხადა ბახტურიძემ.

მისი თქმით, თუკი ზურაბიშვილმა აქამდე გავრცელებული განცხადებიდან ქალების ხმა ვერ გაიგო, აქციაზე მას უფრო ხმამაღლა გააგონებენ.

"თუკი ისევ ჩანდა, რომ ეს რომელიმე კონკრეტული ჯგუფის ან რამდენიმე ქალის განცხადება იყო ჩვენ ვაჩვენებთ, რომ ეს არის რეალური პროცესი ქალების, რომლებსაც აქვთ კონკრეტული არგუმენტები თუ რატომ არ უნდა ინიშნებოდეს ასეთი ღირებულებების და მსგავსი საჯარო განცხადებების მქონე ადამიანები საჯარო თანამდებობებზე", — აღნიშნა ბახტურიძემ.

ქალთა მოძრაობამ რამდენიმე არასამთავრობო ორგანიზაციასთან ერთად გაბუნიას საკითხზე განცხადება ჯერ კიდევ მაშინ გაავრცელა, როცა მისი დანიშვნის შესახებ ინფორმაცია დადასტურებული არ იყო. ქალები მოუწოდებდნენ პრეზიდენტს არ დაენიშნა გაბუნია საპარლამენტო მდივნად.

"რას აკეთებდა რო ისეთს, რომელსაც ნებისმიერი ჩვენგანი არ აკეთებს?.. — სამოქალაქო ორგანიზაციებს მიგვაჩნია, რომ #metoo-ს ეპოქაში, სახელმწიფო სამსახურში ასეთ მაღალ და საპასუხისმგებლო პოზიციას არ უნდა იკავებდეს გენდერულად არამგრძნობიარე ადამიანი, რომელმაც სექსუალური შევიწროება ლამის ნორმად და მისსავე პირად პრაქტიკად წარმოგვიჩინა", — ეწერა ერთობლივ განცხადებაში.

საქართველოს მეხუთე პრეზიდენტმა, სალომე ზურაბიშვილმა პირველ სამუშაო დღეს ადმინისტრაციის ხელმძღვანელი და საპარლამენტო მდივანი წარადგინა. დიმიტრი გაბუნია, რომელიც საპარლამენტო მდივნის პოზიციას იკავებს არაერთ გახმაურებული საქმეში მონაწილეობდა ადვოკატის სტატუსით. ის იყო ქალთა მიერ სექსუალურ შევიწროებაში დადანაშაულებული ზვიად დევდარიანის ადვოკატიც.