საუდის არაბეთმა აშშ სენატის რეზოლუციას ჯამალ ხაშოგის მკვლელობაში საუდის არაბეთის პრინცის მონაწილეობის შესახებ უარყოფს. მათი თქმით, ბრალდებები დაუსაბუთებელია. გარდა ამისა, მათ დაგმეს რეზოლუციის ნაწილი, რომელიც იემენის კონფლიქტში საუდის არაბეთისთვის სამხედრო დახმარების შეწყვეტას ითვალისწინებს.

"სამეფო უარყოფს ყველა ჩარევას თავის შიდა საქმეებში, გმობს ნებისმიერი ფორმით ყველა ბრალდებას, რომელიც პატივს არ სცემს მის მმართველებს და გმობს ნებისმიერ მცდელობას შეარყიოს მისი სუვერენიტეტი და დაამციროს მისი სტატუსი", — ნათქვამია საუდის არაბეთის საგარეო საქმეთა სამინისტროს განცხადებაში.

საუდის არაბეთის სამეფოს ტახტის მემკვიდრე, პრინცი მუჰამედ ბინ სალმანი, ფაქტობრივად, ქვეყნის მმართველია. ქვეყნის ხელისუფლება ამტკიცებს, რომ ჟურნალისტის მკვლელობის შესახებ პრინცმა არაფერი იცოდა.

საუდელი ჟურნალისტი ჯამალ ხაშოგი საუდის არაბეთიდან დევნილი ჟურნალისტი იყო, რომელიც The Washington Post-ის მესვეტედ მუშაობდა. მიმდინარე წლის 2 ოქტომბერს ის სტამბოლში, საუდის არაბეთის საკონსულოში შევიდა, სადაც ის მოკლეს.

14 დეკემბერს აშშ-ს სენატორებმა ერთსულოვნად მიიღეს რეზოლუცია, რომელიც ჟურნალისტ ჯამალ ხაშოგის მკვლელობაზე პასუხისმგებლობას საუდის არაბეთის პრინცს მუჰამედ ბინ სალმან ალ-საუდას აკისრებს. მათ მოუწოდეს საუდის არაბეთის ხელისუფლებას დასაჯონ დამნაშავეები.

სენატორების პოზიცია ეწინააღმდეგება პრეზიდენტ დონალდ ტრამპის პოლიტიკას საუდის არაბეთის სამეფოს მიმართ. პრეზიდენტმა ცენტრალური სადაზვერვო სამსახურის ანგარიშიც არ მიიღო, რომლის მიხედვითაც ჯამალ ხაშოგი, შესაძლოა, პრინცის ბრძანებით მოკლეს.

გარდა ამისა, აშშ-ის სენატმა მიიღო რეზოლუცია, რომლის მიხედვითაც ჟურნალისტი ჯამალ ხაშოგის მკვლელობის გამო იემენის კონფლიქტში აშშ საუდის არაბეთს სამხედრო დახმარებას წყვეტს. იემენის რეზოლუციას მხარი 56-მა სენატორმა დაუჭირა, ხოლო 41 წინააღმდეგი იყო. რეზოლუციის ავტორები იყვნენ სენატორები ორივე, დემოკრატიული და რესპუბლიკური პარტიებიდან.

რეზოლუციას სარეკომენდაციო ხასიათი აქვს და შესაძლოა პრეზიდენტმა ის არ მიიღოს. დონალდ ტრამპს ნათქვამი აქვს, რომ მის დაბლოკვას აპირებს. მოსალოდნელია, რომ კონგრესის წარმომადგენლობითი პალატა რეზოლუციას არ დაამტკიცებს.

იემენში 2015 წლიდან სამოქალაქო ომი მიმდინარეობს. მდგომარეობა განსაკუთრებით დაიძაბა მას შემდეგ, რაც საუდის არაბეთის ლიდერობით კოალიცია თავს დაესხა შიიტი მუსლიმების დაჯგუფებას, ჰუსიტებს.

იემენის კონფლიქტის რეზოლუცია მოუწოდებს აშშ-ს პრეზიდენტს კონფლიქტის ზონიდან გამოიყვანოს ყველა სამხედრო ძალა იმათ გარდა, ვინც უშუალოდ ექსტრემისტებს ებრძვის.

ამავე თემაზე: