ე.წ. ყვითელჟილეტიანების საპროტესტო აქციისა და ვანდალური დარბევის საფრთხის გამო შაბათს, 8 დეკემბერს ეიფელის კოშკი დაიხურება. პრემიერ-მინისტრის, ედუარდ ფილიპის განცხადებაში აქციებისთვის ქალაქში 89 ათასი პოლიციელი და სპეცტექნიკა იქნება მობილიზებული. პოლიციამ ელისეის მინდვრებზე განლაგებულ მაღაზიებს მოუწოდა, რომ შაბათს არ იმუშაონ, გარდა ამისა დაიკეტება რამდენიმე მუზეუმი.

ორ კვირაზე მეტია მთელი საფრანგეთი, განსაკუთრებით კი პარიზი ე.წ. ყვითელჟილეტიანების აქციებმა მოიცვა. ისინი საწვავის ფასის ზრდას აპროტესტებდნენ და პრეზიდენტ ემანუელ მაკრონის გადადგომას ითხოვდნენ. პოლიცია დემონსტრანტების დასაშლელად იყენებდა ცრემლსადენ გაზსა და წყლის ჭავლს.

წინა კვირას კი ქალაქის ისტორიაში ერთ-ერთი ყველაზე მასშტაბური არეულობა იყო. დემონსტრანტები არბევდნენ პარიზის ქუჩებს, მაღაზიებსა და კულტურულ ძეგლებს, ცეცხლს უკიდებდნენ მანქანებსა და საბურავებს. ვანდალური დარბევის მსხვერპლი გახდა ტრიუმფალური თაღიც.

მიუხედავად იმისა, რომ მთავრობამ საწვავის ფასის ზრდაზე უარი განაცხადა, ე.წ. ყვითელჟილეტიანები ქუჩაში მაინც გადიან.