რუსეთის საგარეო საქმეთა სამინისტრო მოუწოდებს, საფრანგეთის ხელისუფლებას აქციების დარბევისას ძალის გადამეტებისგან თავი შეიკავონ. ასევე, არ დაივიწყონ სიტყვის თავისუფლების პატივისცემა და სამართალდამცავი ღონისძიებების გატარებისას ჰუმანური მეთოდები გამოიყენონ. ამის შესახებ უწყების პრესპიკერმა, მარია ზახაროვამ ისაუბრა.

რუსეთის საგარეო უწყებაში აცხადებენ, რომ აქციების გაშუქებისას დაშავდნენ რუსული სახელისუფლებო მედიის Russia Today-ის საფრანგეთის ბიუროს ჟურნალისტები. რუსეთი მოითხოვს საფრანგეთმა ჟურნალისტებისთვის უსაფრთხო სამუშაო გარემო უზრუნველყოს.

"ჟურნალისტები არ უნდა გახდნენ სამიზნე პოლიციისთვის. მინდა შეგახსენოთ, რომ ზუსტად ამას გვასწავლიდა საფრანგეთის საგარეო საქმეთა სამინისტრო რეგულარულად. არ დაგავიწყდეთ ის, რასაც ჩვენ გვასწავლიდით", — განაცხადა ზახაროვამ.

რუსეთის ხელისუფლება ცნობილია აგრესიული დამოკიდებულებით ოპოზიციური აზრის და აქციების მიმართ. მათ არაერთხელ დაშალეს ძალისმიერი მეთოდით საპროტესტო აქციები.

რუსი ჯარისკაცი სცემს დემონსტრანტს, რომელიც საპენსიო რეფორმებს აპროტესტებდა

რუსეთში მიმდინარე აქციაზე ძალის გამოყენებით არაერთი არასრულწლოვანი დააკავეს

პუტინის მთავარ ოპოზიციონერს, ალექსეი ნავალნის, რომელიც ხშირად მართავს საპროტესტო აქციებს კრემლის პოლიტიკისა და პრეზიდენტის წინააღმდეგ თითქმის ყოველ აქციაზე აკავებენ.

უფლებადამცველი ორგანიზაცია PEN International, რომელიც მოსკოვში მედიის თავისუფლებას იკვლევდა აცხადებს, რომ რუსეთში გამოხატვის თავისუფლებას აგრესიულად ესხმიან თავს ყველა ფრონტზე.

დემონსტრაციები პარიზში

ორ კვირაზე მეტია მთელი საფრანგეთი, განსაკუთრებით კი პარიზი ე.წ. ყვითელჟილეტიანების აქციებმა მოიცვა. ისინი საწვავის ფასის ზრდას აპროტესტებდნენ და პრეზიდენტ ემანუელ მაკრონის გადადგომას ითხოვდნენ.

ბოლო ერთი წლის განმავლობაში საფრანგეთში დიზელის საწვავის ფასი 23 პროცენტით გაიზარდა. ფასის ზრდა თავის მხრივ დაკავშირებულია ბენზინსა და დიზელზე გადასახადების ზრდით, რომელიც მაკრონმა შემოიღო.

2019 წელს კი საწვავზე ფასი კიდევ ერთხელ უნდა გაზრდილიყო, რამაც გააბრაზა ე.წ. ყვითელჟილეტიანები — ასეთი ჟილეტი საფრანგეთის ნებისმიერმა მძღოლმა მანქანაში უნდა იქონიოს.

საპროტესტო აქციებში ათი ათასობით ადამიანი იღებდა მონაწილეობას. დემონსტრანტები არბევდნენ პარიზის ქუჩებს, მაღაზიებსა და კულტურულ ძეგლებს, ცეცხლს უკიდებდნენ მანქანებსა და საბურავებს. ვანდალური დარბევის მსხვერპლი გახდა ტრიუმფალური თაღიც.

ფოტო: Reuters

ფოტო: Reuters

პოლიცია დემონსტრანტების დასაშლელად იყენებდა ცრემლსადენ გაზსა და წყლის ჭავლს. ბოლო მასშტაბური აქციის დროს, პირველ 1-2 დეკემბერს დაშავდა 133 ადამიანი, მათ შორის 23 პოლიციელი, ხოლო 350-ზე მეტი ადამიანი დააკავეს.