პარტია ევროპული საქართველო გაერთიანებული ოპოზიციის მიერ ორ დეკემბერს დაანონსებულ აქციას არ უერთდება. ამის შესახებ პარტიის ერთ-ერთმა ლიდერმა, დავით ბაქრაძემ განაცხადა. გადაწყვეტილება ევროპული საქართველოს პოლიტსაბჭოზე მიიღეს.

ბაქრაძის თქმით, შექმნილ ვითარებაში ლეგიტიმური და გასაგებია იმ ხალხის წუხილი და პროტესტი, რომელიც უკმაყოფილოა არჩევნების შედეგით, თუმცა პარტია ბრძოლას პოლიტიკური რეფორმებით აპირებს.

"პოლიტიკური ბრძოლის გზა გადის პოლიტიკურ რეფორმებზე და არა საპროტესტო აქციებზე", — განაცხადა მან.

ბაქრაძის თქმით, ჯერ სისტემა უნდა შეიცვალოს, შემდეგ კი საპარლამენტო არჩევნები გაიმართოს. მან აღნიშნა, რომ ევროპული საქართველო იმუშავებს იმ ხარვეზებზე, რომლებიც არჩევნების დროს დაფიქსირდა. ბაქრაძე ამბობს, რომ ისინი შეეცდებიან, პოლიტიკურ რეფორმებზე დაფუძნებით შეცვალონ ხელისუფლება.

ბაქრაძე ამბობს, რომ არჩევნების მეორე ტური მოსახლეობის თავისუფალი ნების გამომხატველად ვერ ჩაითვლება.

გაერთიანებული ოპოციზიის საპრეზიდენტო კანდიდატმა, გრიგოლ ვაშაძემ არჩევნების მეორე ტურის შედეგები არ აღიარა. ამის შესახებ მან ფილარმონიაში, მოქალაქეებთან შეხვედრის დროს განაცხადა.

"საქართველოს პრეზიდენტი არ ჰყავს", — თქვა მან და ვადამდელი საპარლამენტო არჩევნების მოთხოვნით ორ დეკემბერს თბილისში, პარლამენტის წინ აქცია დააანონსა. აქციაზე ისმოდა შეძახილები "ბრძოლა, ბრძოლა", სკაიპით ჩართულ ექსპრეზიდენტს კი ეძახდნენ "ჩამოდის".

არჩევნების შედეგები

პრეზიდენტობის კანდიდატებს შორის ხმები პროცენტულად ასე გადანაწილდა:

  • სალომე ზურაბიშვილი — 59,52%;
  • გრიგოლ ვაშაძემ — 40,48%.