სალომე ზურაბიშვილი, რომელიც ცესკოს წინასწარი შედეგებით პრეზიდენტი ხდება, ფლობს ბინას პარიზში და სახლს ეზოთი თბილისში. ქონება მან, როგორც დეპუტატმა, 2018 წლის 17 იანვარს შევსებულ დეკლარაციაში ასახა.

დოკუმენტის თანახმად, სალომე ზურაბიშვილი თბილისში, კუფტინის #5-ში 126 მ² ფართობის საცხოვრებელ სახლს ფლობს. იმავე მისამართზე, დარეგისტრირებული აქვს 235 მ² მიწის ნაკვეთი. იგი მან 160 000 აშშ დოლარად შეიძინა 2006 წელს.

გარდა ამისა, ზურაბიშვილი ფლობს 150 000 ევროდ შეძენილ, 60 მ² ფართობის ბინას პარიზში და 17 000 აშშ დოლარად შეძენილ მსუბუქ ავტომანქანას Hyundai 2012-ს.

დეკლარაციით ირკვევა, რომ სალომე ზურაბიშვილი ფლობს აქციებსაც საქართველოს ბანკში, რაც მან მემკვიდრეობით მიიღო 2013 წელს. ზურაბიშვილი აქციებს ფლობს კომპანია თელიანში, რაც ასევე მემკვიდრეობით მიიღო.

სალომე ზურაბიშვილი საქართველოს ბანკში გახსნილ ანაბარზე ინახავს 50 000 აშშ დოლარს, სახელფასო ანგარიშზე 3 000 ლარს, პარიზის ტრანსატლანტიკურ ბანკში კი 7 400 ევროს.