ცესკოს წინასწარი შედეგებით, აშშ-ში გაერთიანებული ოპოზიციის საპრეზიდენტო კანდიდატმა, გრიგოლ ვაშაძემ მოიგო. ნიუ-იორკისა და ვაშინგტონის სამივე უბანზე მან 920 ხმა მიიღო. მმართველი გუნდის მიერ მხარდაჭერილმა საპრეზიდენტო კანდიდატმა, სალომე ზურაბიშვილმა კი ჯამში 515 ხმა მოიპოვა.

გარდა ამისა, ცესკოს წინასწარი მონაცემებით, გრილო ვაშაძემ მოიგო საზღვარგარეთის საარჩევნო ოლქებში:

  • გრიგოლ ვაშაძე — 64,24%;
  • სალომე ზურაბიშვილი — 35,76%.

ცესკოს წინასწარი მონაცემებით, დათვლილია ხმების 100%, რის მიხედვითაც საქართველოს მეხუთე პრეზიდენტი სალომე ზურაბიშვილი ხდება.

საპრეზიდენტო არჩევნების მეორე ტური შუა კვირაში, 28 ნოემბერს გაიმართა. არასამთავრობო ორგანიზაციები და ოპოზიცია აღნიშნულ თარიღს ეწინააღმდეგებოდნენ და ამტკიცებდნენ, რომ სამუშაო დღეს არჩევნების დანიშვნა საზღვარგარეთ მცხოვრებ ამომრჩეველს ხმის მიცემაში ხელს შეუშლიდა.

ორი ეგზიტპოლის შედეგები

რუსთავი 2-ისა და იმედის ეგზიტპოლებით საპრეზიდენტო არჩევნებს მმართველი გუნდის მიერ მხარდაჭერილი კანდიდატი სალომე ზურაბიშვილი იგებდა. იმედის შედეგებით, საპრეზიდენტო არჩევნებში მმართველი გუნდის მიერ მხარდაჭერილ კანდიდატს, სალომე ზურაბიშვილს ხმების 58 პროცენტი ჰქონდა. გაერთიანებული ოპოზიციის პრეზიდენტობის კანდიდატმა, გრიგოლ ვაშაძემ კი კი ხმების 42 პროცენტი მიიღო.

რუსთავი 2-ის ეგზიტპოლის შედეგების მიხედვით, საპრეზიდენტო არჩევნებში მმართველი გუნდის მიერ მხარდაჭერილი კანდიდატი, სალომე ზურაბიშვილი 55 პროცენტით იგებს. გაერთიანებული ოპოზიციის პრეზიდენტობის კანდიდატმა კი ხმების 45 პროცენტი მიიღო. რუსთავი 2-მა ედისონ რისერჩის ეგზიტპოლის 17:00 საათის მონაცემები გამოაქვეყნა.