ახალგაზრდა იურისტთა ასოციაცია თბილისის მერს, დავით ნარმანიას შეურაცხმყოფელი გამონათქვამის გამო, საჯაროდ ბოდიშის მოხდისკენ მოუწოდებს და ამისთვის ონლაინ პეტიციას ავრცელებს.

"2016 წლის 24 აგვისტოს, ქ. თბილისის მერიაში გამწვანების რეგულაციების საკითხზე გაიმართა შეხვედრა. შეხვედრის მიმდინარეობისას, დავით ნარმანიამ სამოქალაქო აქტივისტს სიტყვა შეაწყვეტინა და მიმართა ფრაზით - ,,მე თქვენთვის სიტყვა არ მომიცია [...] მაიმუნი ვირიშვილი ეს...“

ხელისუფლების წარმომადგენლის მხრიდან მოქალაქის მიმართ ამგვარი მიმართვა არის სრულიად მიუღებელი. მივმართავთ დავით ნარმანიას, საჯაროდ მოიხადოს ბოდიში შეურაცხმყოფელი გამონათქვამისათვის", - წერია საიას მიერ გავრცელებულ პეტიციაში.

პეტიცია 1 საათის წინ გავრცელდა და მას უკვე 118 ადამიანი აწერს ხელს, სულ კი 10 ათასი ხელმოწერაა საჭირო.

24 აგვისტოს თბილისის მერიაში გამწვანების რეგულაციების თემაზე გამართულ შეხვედრაზე თბილისის მერმა, დავით ნარმანიამ მწვანე მუშტის წარმომადგენელს, ირაკლი კუპრაძეს სიტყვიერი შეურაცხყოფა მიაყენა:

"მე თქვენთვის სიტყვა არ მომიცია, ვინ არის ეს. მაიმუნი ვირიშვილი, ულტიმატუმებით შემოვიდა".