მალხაზ მაჩალიკაშვილმა პარლამენტის წინ გამართულ საპროტესტო აქციაზე განაცხადა, რომ ხელისუფლებას შეცდომის აღიარებისთვის ვადას 26 დეკემბრამდე აძლევს. სწორედ 26 დეკემბერს გადის პანკისის სპეცოპერაციიდან ერთი წელი.

"შემდგომში ვეცდები, ჩავრიო სხვა სახელმწიფოს ლიდერები", — აღნიშნა მაჩალიკაშვილმა.

მაჩალიკაშვილის თქმით, ის და ზაზა სარალიძე იქამდე გააგრძელებენ აქციებს, სანამ ყველა კითხვას პასუხი არ გაეცემა და დანაშაულში ჩარეული ყველა პირი არ დაისჯება.

პანკისის სპეცოპერაციის შედეგად მოკლული თემირლან მაჩალიკაშვილის მამა, მალხაზ მაჩალიკაშვილი თბილისში, პარლამენტის შენობის წინ კვლავ აქციას მართავს. დღეს, 25 ნოემბერს, შვილის დაბადების დღეზე მალხაზ მაჩალიკაშვილი სახელმწიფო თანამდებობის პირებისგან მისი შვილის მკვლელობაში მონაწილე პირების დასჯას ითხოვს.

სპეცოპერაცია პანკისში

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა.

რამდენიმე კვირის შემდეგ, 26 დეკემბერს, პანკისში, ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს.

სახელმწიფო უსაფრთხოების სამსახურის ინფორმაციით, 19 წლის თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო და რამდენიმე დღეში საავადმყოფოში გარდაიცვალა. მაჩალიკაშვილის ოჯახი სუს-ის ვერსიას არ იზიარებს და ამბობს, რომ თემირლანი მოკლეს. ოჯახის წევრები ამბობენ, რომ სპეცოპერაციის ღამეს მათთან სუს-ის უფროსის მაშინდელი მოადგილე სოსო გოგაშვილი იყო ჩასული და ემუქრებოდა.

გოგაშვილი 21 აგვისტოს მოულოდნელად თანამდებობიდან გადადგა.